یہ کافر بت جنہیں دعویٰ ہے دنیا میں خدائی کا

یہ کافر بت جنہیں دعویٰ ہے دنیا میں خدائی کا

ملیں محشر میں مجھ عاصی کو صدقہ کبریائی کا

یہ مجھ سے سخت جاں پر شوق خنجر آزمائی کا

خدا حافظ مرے قاتل تری نازک کلائی کا

نہ ہو پہلو میں میرے دل تو کوئی بات کیوں پوچھے

یہی تو اک ذریعہ ہے حسینوں تک رسائی کا

تم اچھے غیر اچھا غیر کی تقدیر بھی اچھی

یہ آخر ذکر کیوں ہے میری قسمت کی برائی کا

وہ کیا سوئیں گے غافل ہو کے شب بھر مرے پہلو میں

انہیں یہ فکر ہے نکلے کوئی پہلو لڑائی کا

ہزاروں دیدہ و دل بام لاکھوں طور سے بڑھ کر

کروڑوں جلوہ گاہیں شوق تو ہو خود نمائی کا

قفس میں اب کہاں وہ انبساط صبح آزادی

چمن تک لطف تھا صیاد میری خوشنوائی کا

اشارے پر ترے چل کر یہ لائے رنگ مشکل ہے

ابھی محتاج ہے خنجر ترے دست حنائی کا

کوئی کیا جائے جنت میں کہ اس نے طول کھینچا ہے

قیامت پر بھی سایہ پڑ گیا روز جدائی کا

وہ دن بھی آئے ہم ہوں اور گلیاں ہوں مدینے کی

گدایانہ صدا ہو ہاتھ میں کاسہ گدائی کا

بنائی کیا بری گت مے کدے میں بادہ نوشوں نے

ریاضؔ آئے تھے کل جامہ پہن کر پارسائی کا

ye kafir but jinhen daawa hai duniya mein khudai ka

milen mahshar mein mujh asi ko sadqa kibriyai ka

ye mujh se sakht jan par shauq khanjar azmai ka

khuda hafiz mire qatil tiri nazuk kalai ka

na ho pahlu mein mere dil to koi bat kyun puchhe

yahi to ik zaria hai hasinon tak rasai ka

tum achchhe ghair achchha ghair ki taqdir bhi achchhi

ye akhir zikr kyun hai meri qismat ki burai ka

wo kya soenge ghafil ho ke shab bhar mire pahlu mein

unhen ye fikr hai nikle koi pahlu larai ka

hazaron dida-o-dil bam lakhon tur se barh kar

karoron jalwa gahen shauq to ho khud numai ka

qafas mein ab kahan wo imbisat-e-subh-e-azadi

chaman tak lutf tha sayyad meri khushnawai ka

ishare par tire chal kar ye lae rang mushkil hai

abhi mohtaj hai khanjar tire dast-e-hinai ka

koi kya jae jannat mein ke us ne tul khincha hai

qayamat par bhi saya par gaya roz-e-judai ka

wo din bhi ae ham hun aur galiyan hun madine ki

gadayana sada ho hath mein kasa gadai ka

banai kya buri gat mai kade mein bada noshon ne

riyaz ae the kal jama pahan kar parsai ka