یہ کون غزل خواں ہے پُرسوز و نشاط انگیز

یہ کون غزل خواں ہے پُرسوز و نشاط انگیز

اندیشۂ دانا کو کرتا ہے جُنوں آمیز

گو فقر بھی رکھتا ہے اندازِ ملوکانہ

نا پُختہ ہے پرویزی بے سلطنتِ پرویز

اب حُجرۂ صوفی میں وہ فقر نہیں باقی

خُونِ دلِ شیراں ہو جس فقر کی دستاویز

اے حلقۂ درویشاں! وہ مردِ خدا کیسا

ہو جس کے گریباں میں ہنگامۂ رستاخیز

جو ذکر کی گرمی سے شُعلے کی طرح روشن

جو فکر کی سُرعت میں بجلی سے زیادہ تیز!

کرتی ہے ملوکیّت آثارِ جُنوں پیدا

اللہ کے نشتر ہیں تیمور ہو یا چنگیز

یوں دادِ سخن مجھ کو دیتے ہیں عراق و پارس

یہ کافرِ ہندی ہے بے تیغ و سناں خُوں‌ریز

ye kaun ghazal khwan hai pursoz-o-nishat angez

andesha-e-dana ko karta hai junun amez

go faqr bhi rakhta hai andaz-e-mulukana

na pukhta hai parwezi be saltanat-e-parwez

ab hujra-e-sufi mein wo faqr nahin baqi

khun-e-dil-e-sheran ho jis faqr ki dastawez

ai halqa-e-darweshan! wo mard-e-khuda kaisa

ho jis ke gareban mein hangama-e-rastakhez

jo zikr ki garmi se shole ki tarah raushan

jo fikr ki surat mein bijli se ziyada tez!

karti hai mulukiyyat asar-e-junun paida

allah ke nashtar hain timor ho ya changez

yun dad-e-sukhan mujh ko dete hain iraq-o-paras

ye kafir-e-hindi hai be tegh-o-sinan khunrez