Arooz is now on the App Store, for iPhone and iPad. Download →

All poetry

یہ دنیا کتنی پیاری ہے

Akhtar Shirani (1905–1948)

یہ دنیا کتنی پیاری ہے

ہر اک بات اس کی نیاری ہے

یہ دنیا کتنی پیاری ہے

مکاں آباد ہیں کیسے

مکیں دل شاد ہیں کیسے

یہ دنیا کتنی پیاری ہے

کبھی دن ہے نظارے ہیں

کبھی ہے رات تارے ہیں

یہ دنیا کتنی پیاری ہے

چمن میں پودے ہلتے ہیں

گلے آپس میں ملتے ہیں

یہ دنیا کتنی پیاری ہے

گجر دم گاتی ہیں چڑیاں

دلوں کو بھاتی ہیں چڑیاں

یہ دنیا کتنی پیاری ہے

کھلے ہیں پھول گلشن میں

اگی ہیں جھاڑیاں بن میں

یہ دنیا کتنی پیاری ہے

ہوا کے جھونکے آتے ہیں

شگوفے مسکراتے ہیں

یہ دنیا کتنی پیاری ہے

پرندے چہچہاتے ہیں

ہمارا جی لبھاتے ہیں

یہ دنیا کتنی پیاری ہے

گھٹائیں گھر کے آتی ہیں

بہاریں مینہ کی لاتی ہیں

یہ دنیا کتنی پیاری ہے

سمندر ہیں رواں دیکھو

جہاز اور کشتیاں دیکھو

یہ دنیا کتنی پیاری ہے

یہ کوسوں تک ہرے جنگل

درختوں سے بھرے جنگل

یہ دنیا کتنی پیاری ہے

یہ دنیا کتنی پیاری ہے