یہ سر بہ مہر بوتلیں ہیں جو شراب کی

یہ سر بہ مہر بوتلیں ہیں جو شراب کی

راتیں ہیں ان میں بند ہماری شباب کی

پوچھو نہ ہم سے عالم غفلت کے خواب کی

دنیا کچھ اور ہی تھی ہمارے شباب کی

یہ نشہ آنکھ دیکھ کے اس مست خواب کی

جیسے ابھی چڑھائی ہو بوتل شراب کی

سرخی شفق کی شکل مہ و آفتاب کی

چھلکی ہوئی شراب ہے جام و شراب کی

کیوں ٹوٹتی ہیں بجلیوں پر آج بجلیاں

شاید گرہ کھلی ترے بند نقاب کی

مینا و جام دیکھ کے خوش ہوگا محتسب

سمجھے گا وہ کھلی ہوئی کلیاں گلاب کی

تھی سر بہ مہر پھوٹ گئی اپنے زور میں

توبہ سے پہلے ٹوٹی ہے بوتل شراب کی

شرما گئیں جو بوسۂ لب باغ میں لیا

سمٹی ہیں کیا کھلی ہوئی کلیاں گلاب کی

ہم نے تمام عمر میں کتنی شراب پی

شاید بتا سکے ہمیں میزاں حساب کی

چہرے کا رنگ دیکھ لو تم رکھ کے آئنہ

بوسے سے دوڑ جائے گی سرخی شہاب کی

محفل میں پی جو پھول تو اس احتیاط سے

مینائے مے نے بو نہ کبھی دی شراب کی

اے کثرت گناہ ترے ڈر سے دب گئی

دیکھا مجھے کہ جھک گئی میزاں حساب کی

ذرہ ہوا میں بھر کے بنا آدمی کی شکل

قطرہ ہوا میں بھر کے ہے صورت حباب کی

چکر ہوا نے اتنے دیئے ہیں کہ گرد باد

تصویر بن گیا ہے مرے پیچ و تاب کی

سائے سے اس کی زلف کے بنت عنب کو کیا

بن کر پری اڑے گی یہ بوتل شراب کی

یہ کہہ کے کل دکھائے انہیں پارۂ جگر

بکھری ہوئی یہ پنکھڑیاں ہیں گلاب کی

ہر شام ساتھ لاتی ہے اک چودھویں کا چاند

کیا جانیں کیا کریں گی یہ راتیں شباب کی

کم بخت نے شراب کا ذکر اس قدر کیا

واعظ کے منہ سے آنے لگی بو شراب کی

دو گھونٹ پر شراب کے ہے حصر زندگی

راتیں شباب کی ہیں نہ باتیں شباب کی

کام آئے گی ریاضؔ کے مشق طواف خم

کعبے کے گرد ہوں گے جو سوجھی ثواب کی

ye sar ba mehr botalen hain jo sharab ki

raten hain un mein band hamari shabab ki

puchho na ham se alam-e-ghaflat ke khwab ki

duniya kuchh aur hi thi hamare shabab ki

ye nasha ankh dekh ke is mast-e-khwab ki

jaise abhi charhai ho botal sharab ki

surkhi shafaq ki shakl-e-mah-o-aftab ki

chhalki hui sharab hai jam-o-sharab ki

kyun tutti hain bijliyon par aj bijliyan

shayad girah khuli tire band-e-naqab ki

mina-o-jam dekh ke khush hoga mohtasib

samjhega wo khuli hui kaliyan gulab ki

thi sar ba mehr phut gai apne zor mein

tauba se pahle tuti hai botal sharab ki

sharma gain jo bosa-e-lab bagh mein liya

simti hain kya khuli hui kaliyan gulab ki

ham ne tamam umr mein kitni sharab pi

shayad bata sake hamen mizan hisab ki

chehre ka rang dekh lo tum rakh ke aina

bose se daur jaegi surkhi shahab ki

mahfil mein pi jo phul to is ehtiyat se

mina-e-mai ne bu na kabhi di sharab ki

ai kasrat-e-gunah tire dar se dab gai

dekha mujhe ke jhuk gai mizan hisab ki

zarra hawa mein bhar ke bina admi ki shakl

qatra hawa mein bhar ke hai surat habab ki

chakkar hawa ne itne diye hain ke gard-e-bad

taswir ban gaya hai mire pech-o-tab ki

sae se us ki zulf ke bint-e-amb ko kya

ban kar pari uregi ye botal sharab ki

ye kah ke kal dikhae unhen para-e-jigar

bikhri hui ye pankhuriyan hain gulab ki

har sham sath lati hai ik chaudhwin ka chand

kya janen kya karengi ye raten shabab ki

kam bakht ne sharab ka zikr is qadar kiya

waiz ke munh se ane lagi bu sharab ki

do ghunt par sharab ke hai hasr zindagi

raten shabab ki hain na baten shabab ki

kam aegi riyaz ke mashq-e-tawaf-e-kham

kaabe ke gard honge jo sujhi sawab ki