یہ دَیرِ کُہن کیا ہے، انبارِ خس و خاشاک

یہ دَیرِ کُہن کیا ہے، انبارِ خس و خاشاک

مشکل ہے گزر اس میں بے نالۂ آتش ناک

نخچیرِ محبّت کا قصّہ نہیں طُولانی

لُطفِ خلشِ پَیکاں، آسودگیِ فِتراک

کھویا گیا جو مطلب ہفتاد و دو ملّت میں

سمجھے گا نہ تُو جب تک بے رنگ نہ ہو ادراک

اک شرعِ مسلمانی، اک جذبِ مسلمانی

ہے جذبِ مسلمانی سِرِّ فلک الافلاک

اے رہروِ فرزانہ، بے جذبِ مسلمانی

نے راہِ عمل پیدا نے شاخِ یقیں نم‌ناک

رمزیں ہیں محبّت کی گُستاخی و بےباکی

ہر شوق نہیں گُستاخ، ہر جذب نہیں بےباک

فارغ تو نہ بیٹھے گا محشر میں جُنوں میرا

یا اپنا گریباں چاک یا دامنِ یزداں چاک!

ye dair-e-kuhan kya hai, ambar-e-khas-o-khashak

mushkil hai guzar is mein be nala-e-atish nak

nakhchir-e-mohabbat ka qissa nahin tulani

lutf-e-khalish-e-paikan, asudgi-e-fitrak

khoya gaya jo matlab haftad-o-do millat mein

samjhega na tu jab tak be rang na ho idrak

ik shar-e-musalmani, ik jazb-e-musalmani

hai jazb-e-musalmani sirr-e-falak alaflak

ai rahrau-e-farzana, be jazb-e-musalmani

ne rah-e-amal paida ne shakh-e-yaqin namnak

ramzen hain mohabbat ki gustakhi-o-bebaki

har shauq nahin gustakh, har jazb nahin bebak

farigh to na baithega mahshar mein junun mera

ya apna gareban chak ya daman-e-yazdan chak!