یہ حُوریانِ فرنگی، دل و نظر کا حجاب

یہ حُوریانِ فرنگی، دل و نظر کا حجاب

بہشتِ مغربیاں، جلوہ ہائے پا بہ رکاب

دل و نظر کا سفینہ سنبھال کر لے جا

مہ و ستارہ ہیں بحرِ وجود میں گرداب

جہانِ صوت و صدا میں سما نہیں سکتی

لطیفۂ ازَلی ہے فغانِ چنگ و رباب

سِکھا دیے ہیں اسے شیوہ ہائے خانقہی

فقیہِ شہر کو صوفی نے کر دیا ہے خراب

وہ سجدہ، روحِ زمیں جس سے کانپ جاتی تھی

اُسی کو آج ترستے ہیں منبر و محراب

سُنی نہ مصر و فلسطیں میں وہ اذاں میں نے

دیا تھا جس نے پہاڑوں کو رعشۂ سیماب

ہوائے قُرطُبہ! شاید یہ ہے اثر تیرا

مری نوا میں ہے سوز و سُرورِ عہدِ شباب

ye huryan-e-farangi, dil-o-nazar ka hijab

bahisht-e-maghribiyan, jalwa ha-e-pa ba rikab

dil-o-nazar ka safina sambhal kar le ja

mah-o-sitara hain bahr-e-wajud mein girdab

jahan-e-saut-o-sada mein sama nahin sakti

latifa-e-azali hai fughan-e-chang-o-rabab

sikha diye hain use shewa hae khanqahi

faqih-e-shahr ko sufi ne kar diya hai kharab

wo sajda, ruh-e-zamin jis se kanp jati thi

usi ko aj taraste hain mimbar-o-mehrab

suni na misr-o-falstin mein wo azan main ne

diya tha jis ne paharon ko raasha-e-simab

hawa-e-qurtuba! shayad ye hai asar tera

miri nawa mein hai soz-o-surur-e-ahd-e-shabab