یہ جتنی دیر ہوئی شیخ کو وضو کرتے

یہ جتنی دیر ہوئی شیخ کو وضو کرتے

ہم اتنی دیر میں خالی خم و سبو کرتے

شکار بھی بط مے کا کنار جو کرتے

وہیں نماز بھی پڑھتے وہیں وضو کرتے

کلیم بات بڑھاتے نہ گفتگو کرتے

لب خموش سے اظہار آرزو کرتے

حسین بھی ہوں خوش آواز بھی فرشتہ قبر

کٹی ہے عمر حسینوں سے گفتگو کرتے

ہماری بھول کا ساگر یہ گل اگر بنتے

تو اور رنگ سے اظہار رنگ و بو کرتے

گراتے یوں ہی سر طور بجلیاں ہم پر

اگر حجاب تھا پردے سے گفتگو کرتے

یہ داغ مے ہیں برے پھیلتے سر دامن

جو آب زمزم و کوثر سے ہم وضو کرتے

ہمیں خدا کے سوا کچھ نظر نہیں آتا

نکل گئے ہیں بہت دور جستجو کرتے

پڑی ہے خوئے صبوحی دراز ہے شب گور

اٹھیں گے حشر کے دن ہم سبو سبو کرتے

مسک گیا ہے کسی کا ذرا سا دامن گل

جگہ جگہ سے سسکتا جو تم رفو کرتے

بقدر ظرف وضو مے جو ملتی پانی سی

سیاہ رو بھی دم حشر شست و شو کرتے

نہ تھا شباب کمر میں ریاضؔ زر ہوتا

تو دن بڑھاپے کے بھی نذر لکھنٔو کرتے

ye jitni der hui shaikh ko wuzu karte

ham itni der mein khali kham-o-subu karte

shikar bhi bat-e-mai ka kanar jo karte

wahin namaz bhi parhte wahin wuzu karte

kalim bat barhate na guftugu karte

lab-e-khamosh se izhar-e-arzu karte

hasin bhi hun khush awaz bhi farishta qabr

kati hai umr hasinon se guftugu karte

hamari bhul ka sagar ye gul agar bante

tu aur rang se izhar rang-o-bu karte

girate yun hi sar-e-tur bijliyan ham par

agar hijab tha parde se guftugu karte

ye dagh-e-mai hain bure phailte sar-e-daman

jo ab-e-zamzam-o-kausar se ham wuzu karte

hamen khuda ke siwa kuchh nazar nahin ata

nikal gae hain bahut dur justuju karte

pari hai khu-e-sabuhi daraz hai shab-e-gor

uthenge hashr ke din ham subu subu karte

masak gaya hai kisi ka zara sa daman-e-gul

jagah jagah se sisakta jo tum rafu karte

baqadr-e-zarf-e-wuzu mai jo milti pani si

siyah ro bhi dam hashr shist-o-sho karte

na tha shabab kamar mein riyaz-e-zar hota

tu din burhape ke bhi nazr-e-likhnau karte