یک نگہ سیں لیا ہے وہ گلفام

یک نگہ سیں لیا ہے وہ گلفام

کیا خرد کیا شکیب کیا آرام

حق میں عشاق کے قیامت ہے

کیا کرم کیا عتاب کیا دشنام

مجھ کوں گل گشت باغ زنداں ہے

سبزہ زنجیر و شاخ سنبل و دام

مے کشی کوں تری گلستاں میں

سرو مینا ہے دور نرگس جام

وقت ہے اب نماز مغرب کا

چاند رخ لب شفق ہے گیسو شام

آرزو ہے جو منزل مقصود

ترک مطلب ہے مدعائے تمام

صدق دل سیں سراجؔ باندھا ہے

کعبۂ کوئے یار کا احرام

yak nigah sin liya hai wo gulfam

kya khirad kya shakeb kya aram

haq mein ushshaq ke qayamat hai

kya karam kya itab kya dushnam

mujh kun gul gasht-e-bagh-e-zindan hai

sabza zanjir-o-shakh-e-sumbul-o-dam

mai kashi kun tiri gulistan mein

sarw-e-mina hai dur nargis jam

waqt hai ab namaz-e-maghrib ka

chand rukh lab shafaq hai gesu sham

arzu hai jo manzil-e-maqsud

tark-e-matlab hai muddaa-e-tamam

sidq-e-dil sin siraj bandha hai

kaaba-e-ku-e-yar ka ehram