یوں غیر کچھ کہیں تو بلا کو بری لگے

یوں غیر کچھ کہیں تو بلا کو بری لگے

تو کچھ نہ کہہ کہ ہم غربا کو بری لگے

تنگی کرے نہ حوصلہ اپنا کہیں بس اب

اتنی جفا نہ کر کہ وفا کو بری لگے

تجھ بن یہ زیست اپنی ہمیں یوں ہے جس طرح

قید حیات اہل فنا کو بری لگے

ہوں خاک تیرے کوچہ کی ہم اور اپنی گرد

تیری گلی سے آہ صبا کو بری لگے

ہم تو سہیں گے وہ بھی پہ لازم نہیں تجھے

اس ناز کی جفا جو ادا کو بری لگے

ہے بے حیائی حد سے جو گرمی زیادہ ہو

شوخی بہت تو مرد و نسا کو بری لگے

چوں آئینہ دل اپنا کدورت سے صاف رکھ

گرد ملال اہل صفا کو بری لگے

ہر دم جواب صاف مروت سے ہے بعید

وہ بات تو نہ کر کہ حیا کو بری لگے

اس بت کی بندگی سے نہ آزاد ہو حسنؔ

یہ بات بھی کہیں نہ خدا کو بری لگے

yun ghair kuchh kahin to bala ko buri lage

to kuchh na kah ke ham ghuraba ko buri lage

tangi kare na hausla apna kahin bas ab

itni jafa na kar ke wafa ko buri lage

tujh bin ye zist apni hamen yun hai jis tarah

qaid-e-hayat ahl-e-fana ko buri lage

hun khak tere kucha ki ham aur apni gard

teri gali se ah saba ko buri lage

ham to sahenge wo bhi pe lazim nahin tujhe

is naz ki jafa jo ada ko buri lage

hai be hayai had se jo garmi ziyada ho

shokhi bahut to mard-o-nasa ko buri lage

chun aina dil apna kudurat se saf rakh

gard-e-malal ahl-e-safa ko buri lage

har dam jawab-e-saf murawwat se hai baid

wo bat to na kar ke haya ko buri lage

us but ki bandagi se na azad ho husn

ye bat bhi kahin na khuda ko buri lage