یا صبر ہو ہمیں کو اس طرف جو نہ نکلیں

یا صبر ہو ہمیں کو اس طرف جو نہ نکلیں

یا اپنے گھر سے بن بن یہ خوبرو نہ نکلیں

ہوتی نہیں تسلی دل کو ہمارے جب تک

دو چار بار اس کے کوچہ سے ہو نہ نکلیں

دل ڈھونڈھنے چلے ہیں کوچہ میں تیرے اپنا

ڈرتے ہیں آپ کو بھی ہم واں سے کھو نہ نکلیں

کوئی بھی دن نہ گزرا ایسا کہ اس گلی سے

زخمی ہو مبتلا ہو جو ایک دو نہ نکلیں

دل اور جگر لہو ہو آنکھوں تلک تو پہنچے

کیا حکم ہے اب آگے نکلیں کہو نہ نکلیں

بستی میں تو دل اپنا لگتا نہیں کہو پھر

صحرا کی طرف کیوں کر اے ناصحو نہ نکلیں

گر وہ نقاب اٹھا دے چہرے سے تو حسنؔ پھر

کچھ غم نہیں مہ و مہر عالم میں گو نہ نکلیں

ya sabr ho hamen ko is taraf jo na niklen

ya apne ghar se ban ban ye khubru na niklen

hoti nahin tasalli dil ko hamare jab tak

do char bar us ke kucha se ho na niklen

dil dhundhne chale hain kucha mein tere apna

darte hain ap ko bhi ham wan se kho na niklen

koi bhi din na guzra aisa ke us gali se

zakhmi ho mubtala ho jo ek do na niklen

dil aur jigar lahu ho ankhon talak to pahunche

kya hukm hai ab age niklen kaho na niklen

basti mein to dil apna lagta nahin kaho phir

sahra ki taraf kyun kar ai naseho na niklen

gar wo naqab utha de chehre se to husn phir

kuchh gham nahin mah-o-mehr-e-alam mein go na niklen