یا رب جو خار غم ہیں جلا دے انہوں کے تئیں

یا رب جو خار غم ہیں جلا دے انہوں کے تئیں

جو غنچۂ طرب ہیں کھلا دے انہوں کے تئیں

انکار حشر جن کو ہے اے سرو خوش خرام

یک بار اپنے قد کو دکھا دے انھوں کے تئیں

کہتے ہیں ابرو و مژہ خوں ریز ہیں تری

ظالم کبھی ہمیں بھی بتا دے انہوں کے تئیں

اس شمع رو کا مجھ سے جو کرتے ہیں سرد دل

اے آہ سوز ناک جلا دے انہوں کے تئیں

سوزاں ہے داغ ہجر مرے دل میں مثل شمع

اے یاد وصل یار بجھا دے انہوں کے تئیں

کرتے ہیں سرکشی جو کف پا سے آبلے

اے خار دشت عشق بٹھا دے انہوں کے تئیں

جو صاف و بے غبار ہیں بیدارؔ آشنا

جوں سرمہ اپنی چشم میں جا دے انہوں کے تئیں

ya rab jo khar-e-gham hain jala de unhon ke tain

jo ghuncha-e-tarab hain khula de unhon ke tain

inkar hashr jin ko hai ai sarw khush khiram

yak bar apne qad ko dikha de inhon ke tain

kahte hain abru-o-mizha khun rez hain tiri

zalim kabhi hamen bhi bata de unhon ke tain

is shama ro ka mujh se jo karte hain sard dil

ai ah soz nak jala de unhon ke tain

sozan hai dagh hijr mire dil mein misl-e-shama

ai yad wasl-e-yar bujha de unhon ke tain

karte hain sarkashi jo kaf-e-pa se able

ai khar-e-dasht-e-ishq bitha de unhon ke tain

jo saf-o-be ghubar hain bedar ashna

jun surma apni chashm mein ja de unhon ke tain