یا مجھے افسر شاہانہ بنایا ہوتا

یا مجھے افسر شاہانہ بنایا ہوتا

یا مرا تاج گدایانہ بنایا ہوتا

اپنا دیوانہ بنایا مجھے ہوتا تو نے

کیوں خرد مند بنایا نہ بنایا ہوتا

خاکساری کے لیے گرچہ بنایا تھا مجھے

کاش خاک در جانانہ بنایا ہوتا

نشۂ عشق کا گر ظرف دیا تھا مجھ کو

عمر کا تنگ نہ پیمانہ بنایا ہوتا

دل صد چاک بنایا تو بلا سے لیکن

زلف مشکیں کا ترے شانہ بنایا ہوتا

صوفیوں کے جو نہ تھا لائق صحبت تو مجھے

قابل جلسۂ رندانہ بنایا ہوتا

تھا جلانا ہی اگر دورئ ساقی سے مجھے

تو چراغ در مے خانہ بنایا ہوتا

شعلۂ حسن چمن میں نہ دکھایا اس نے

ورنہ بلبل کو بھی پروانہ بنایا ہوتا

روز معمورۂ دنیا میں خرابی ہے ظفرؔ

ایسی بستی کو تو ویرانہ بنایا ہوتا

ya mujhe afsar-e-shahana banaya hota

ya mira taj gadayana banaya hota

apna diwana banaya mujhe hota tu ne

kyun khirad mand banaya na banaya hota

khaksari ke liye garche banaya tha mujhe

kash khak-e-dar-e-janana banaya hota

nasha-e-ishq ka gar zarf diya tha mujh ko

umr ka tang na paimana banaya hota

dil-e-sad chak banaya to bala se lekin

zulf-e-mushkin ka tire shana banaya hota

sufiyon ke jo na tha laiq-e-sohbat to mujhe

qabil-e-jalsa-e-rindana banaya hota

tha jalana hi agar duri-e-saqi se mujhe

tu charagh-e-dar-e-mai khana banaya hota

shola-e-husn-e-chaman mein na dikhaya us ne

warna bulbul ko bhi parwana banaya hota

roz mamura-e-duniya mein kharabi hai zafar

aisi basti ko to wirana banaya hota