ہے اپنے قتل کی دل مضطر کو اطلاع

ہے اپنے قتل کی دل مضطر کو اطلاع

گردن کو اطلاع نہ خنجر کو اطلاع

بے پردہ آج نکلے گا پردہ نشیں مرا

کر دے یہ کوئی مہر منور کو اطلاع

چھپ چھپ کے اب جو نکلو تو معلوم ہو مزہ

کر دی ہے میں نے آپ کے گھر بھر کو اطلاع

بلبل نہ باز آئیو فریاد و آہ سے

کب تک نہ ہوگی قلب گل تر کو اطلاع

کس طرح کر دیا دل نازک کو چور چور

اس واقعہ کی خاک ہے پتھر کو اطلاع

کیا کام انقلاب کا کچھ بھی نہیں یہاں

دور فلک کے دورۂ ساغر کو اطلاع

ہٹ جائے اک طرف بت کافر کی راہ سے

دے کوئی جلد دوڑ کے محشر کو اطلاع

چلنے بھی وہ نہ پائے تھے اپنے مقام سے

پہلے سے ہو گئی دل مضطر کو اطلاع

میں سخت جاں ہوں قصد کرے دیکھ بھال کر

پہلے سے ہو گئی ہے یہ خنجر کو اطلاع

پرویںؔ ریاض خلد میں کس کس کو جام دیں

پہلے سے ہے یہ ساقیٔ کوثر کو اطلاع

hai apne qatl ki dil-e-muztar ko ittila

gardan ko ittila na khanjar ko ittila

be parda aj niklega parda nashin mira

kar de ye koi mehr-e-munawwar ko ittila

chhup chhup ke ab jo niklo to maalum ho maza

kar di hai main ne ap ke ghar bhar ko ittila

bulbul na baz ayu fariyad-o-ah se

kab tak na hogi qalb-e-gul-e-tar ko ittila

kis tarah kar diya dil-e-nazuk ko chur chur

is waqia ki khak hai patthar ko ittila

kya kam inqilab ka kuchh bhi nahin yahan

daur-e-falak ke daura-e-saghar ko ittila

hat jae ik taraf but-e-kafir ki rah se

de koi jald daur ke mahshar ko ittila

chalne bhi wo na pae the apne maqam se

pahle se ho gai dil-e-muztar ko ittila

main sakht jan hun qasd kare dekh bhal kar

pahle se ho gai hai ye khanjar ko ittila

parwin riyaz-e-khuld mein kis kis ko jam den

pahle se hai ye saqi-e-kausar ko ittila