ہے جو صاحب کے کف دست پہ یہ چکنی ڈلی

ہے جو صاحب کے کف دست پہ یہ چکنی ڈلی

زیب دیتا ہے اسے جس قدر اچھا کہیے

خامہ انگشت بدنداں کہ اسے کیا لکھیے

ناطقہ سر بہ گریباں کہ اسے کیا کہیے

مہر مکتوب عزیزان گرامی لکھیے

حرز بازوے شگرفان خود آرا کہیے

مسی آلودہ سر انگشت حسیناں لکھیے

داغ طرف جگر عاشق شیدا کہیے

حاتم دست سلیماں کے مشابہ لکھیے

سر پستان پریزاد سے مانا کہیے

اختر سوختۂ قیس سے نسبت دیجیے

خال مشکین رخ دلکش لیلا کہیے

حجر الاسود دیوار حرم کیجیے فرض

نافہ آہوے بیابان ختن کا کہیے

وضع میں اس کو اگر سمجھیے قاف تریاق

رنگ میں سبزۂ نوخیز مسیحا کہیے

صومعے میں اسے ٹھہرائیے گر مہر نماز

میکدے میں اسے خشت خم صہبا کہیے

کیوں اسے قفل در گنج محبت لکھیے

کیوں اسے نقطۂ پرکار تمنا کہیے

کیوں اسے گوہر نایاب تصور کیجیے

کیوں اسے مردمک دیدۂ عنقا کہیے

کیوں اسے تکمۂ پیراہن لیلیٰ لکھیے

کیوں اسے نقش پئے ناقۂ سلما کہیے

بندہ پرور کے کف دست کو دل کیجیے فرض

اور اس چکنی سپاری کو سویدا کہیے

hai jo sahab ke kaf-e-dast pe ye chukni dali

zeb deta hai use jis qadar achchha kahiye

khama angusht badnidan ke use kya likhiye

natiqa sar ba gareban ke use kya kahiye

mehr-e-maktub-e-azizan-e-garami likhiye

hirz bazwe shagrafan-e-khud ara kahiye

missi aluda sar angishat-e-hasinan likhiye

dagh-e-taraf-e-jigar-e-ashiq-e-shaida kahiye

hatim-e-dast-e-sulaiman ke mushabeh likhiye

sar-e-pistan parizad se mana kahiye

akhtar-e-sokhta-e-qais se nisbat dijiye

khal-e-mushkyun-e-rukh dilkash lila kahiye

hajr illasud-e-diwar-e-haram kijiye farz

nafa ahuwe bayaban-e-khutan ka kahiye

waza mein us ko agar samajhiye qaf-e-tiryaq

rang mein sabza-e-naukhez-e-masiha kahiye

some mein use thahraiye gar mehr-e-namaz

maikade mein use khisht-e-kham-e-sahba kahiye

kyun use qufl-e-dar-e-ganj-e-mohabbat likhiye

kyun use nuqta-e-parkar-e-tamanna kahiye

kyun use gauhar-e-nayab tasawwur kijiye

kyun use mardumak-e-dida-e-anqa kahiye

kyun use tukma-e-pairahan-e-laila likhiye

kyun use naqsh piye naqa-e-salma kahiye

banda parwar ke kaf-e-dast ko dil kijiye farz

aur is chukni supari ko suwaida kahiye