ہوتے خدا کے اس بت کافر کی چاہ کی

ہوتے خدا کے اس بت کافر کی چاہ کی

اتنی تو بات مجھ سے ہوئی ہے گناہ کی

سوز دروں کیا جو مرا شمع نے بیاں

جل کر زبان کاٹ لی میرے گواہ کی

بھرتا ہے آج خوب طرارے سمند ناز

قمچی ہے ان کے ہاتھ میں زلف سیاہ کی

دیکھا حضور کو جو مکدر تو مر گئے

ہم مٹ گئے جو آپ نے میلی نگاہ کی

فرقت میں یاد آئے جو لطف شب و صال

اک آہ بھر کے جانب گردوں نگاہ کی

سنسان کر دیا مرے پہلو کو لے کے دل

ظالم نے لوٹ کر مری بستی تباہ کی

وہ مجھ سے کہہ رہے ہیں اشاروں میں دیکھنا

سب تاڑ جائیں گے سر محفل جو آہ کی

ہم وہ تھے دل ہی دل میں کیا ضبط راز عشق

صدمے اٹھا کے مر گئے منہ سے نہ آہ کی

افسوس ہے کہ میں تو پھروں در بدر خراب

تم کو خبر نہ ہو مرے حال تباہ کی

جوہرؔ خدا کے فضل سے ایسی غزل کہی

شہرت مشاعرہ میں ہوئی واہ واہ کی

hote khuda ke us but-e-kafir ki chah ki

itni to bat mujh se hui hai gunah ki

soz-e-darun kiya jo mira shama ne bayan

jal kar zaban kat li mere gawah ki

bharta hai aj khub tarare samand-e-naz

qumchi hai un ke hath mein zulf-e-siyah ki

dekha huzur ko jo mukaddar to mar gae

ham mit gae jo ap ne maili nigah ki

furqat mein yad ae jo lutf-e-shab-o-sal

ik ah bhar ke janib-e-gardun nigah ki

sunsan kar diya mire pahlu ko le ke dil

zalim ne laut kar miri basti tabah ki

wo mujh se kah rahe hain isharon mein dekhna

sab tar jaenge sar-e-mahfil jo ah ki

ham wo the dil hi dil mein kiya zabt-e-raz-e-ishq

sadme utha ke mar gae munh se na ah ki

afsos hai ke main to phirun dar badar kharab

tum ko khabar na ho mire hal-e-tabah ki

jauhar khuda ke fazl se aisi ghazal kahi

shohrat mushaara mein hui wah wah ki