ہولی (نظیر اکبر آبادی, II)

پھر آن کے عشرت کا مچا ڈھنگ زمیں پر

اور عیش نے عرصہ ہے کیا تنگ زمیں پر

ہر دل کو خوشی کا ہوا آہنگ زمیں پر

ہوتا ہے کہیں راگ کہیں رنگ زمیں پر

بجتے ہیں کہیں تال کہیں زنگ زمیں پر

ہولی نے مچایا ہے عجب رنگ زمیں پر

گھنگرو کی پڑی آن کے پھر کان میں جھنکار

سارنگی ہوئی بین طنبوروں کی مددگار

طبلوں کے ٹھکے طبل یہ سازوں کے بجے تار

راگوں کے کہیں غل کہیں ناچوں کے بندھے تار

ڈھولک کہیں جھنکارے ہے مردنگ زمیں پر

ہولی نے مچایا ہے عجب رنگ زمیں پر

مستی میں اٹھا آنکھ جدھر دیکھو اہاہا

ناچے ہے طوائف کہیں مٹکے ہے بھویا

چلتے ہیں کہیں جام کہیں سوانگ کا چرچا

او رنگ کو گلیوں میں جو دیکھو تو ہر اک جا

بہتی ہیں امنڈ کر جمن و گنگ زمیں پر

ہولی نے مچایا ہے عجب رنگ زمیں پر

بھاگے ہے کہیں رنگ کسی پر جو کوئی ڈال

وہ پوٹلی مارے ہے اسے دوڑ کے فی الحال

یہ ٹانگ گھسیٹے ہے تو وہ کھینچے پکڑ بال

وہ ہاتھ مروڑے تو یہ توڑے ہے کھڑا گال

اس ڈھب کے ہر اک جا پہ مچے ڈھنگ زمیں پر

ہولی نے مچایا ہے عجب رنگ زمیں پر

بیٹھے ہیں سب آپس میں نہیں ایک بھی کڑوا

پچکاری اٹھا کر کوئی جھمکاوے ہے کھڑوا

بھرتے ہیں کہیں مشک کہیں رنگ کا گڑوا

کیا شاد وہ ہوتا ہے جسے کہتے ہیں بھڑوا

سننے میں یہاں تک نہیں اب ننگ زمیں پر

ہولی نے مچایا ہے عجب رنگ زمیں پر

ہولی کی نظیرؔ اب جو بہاریں ہیں اہاہا

محبوب رنگیلوں کی قطاریں ہیں اہاہا

کپڑوں پہ جمی رنگ کی دھاریں ہیں اہاہا

سب ہولی ہے ہولی ہی پکارے ہیں اہاہا

کیا عیش ہے کیا رنگ ہے کیا ڈھنگ زمیں پر

ہولی نے مچایا ہے عجب رنگ زمیں پر

phir an ke ishrat ka macha dhang zamin par

aur aish ne arsa hai kiya tang zamin par

har dil ko khushi ka hua ahang-e-zamin par

hota hai kahin rag kahin rang zamin par

bajte hain kahin tal kahin zang zamin par

holi ne machaya hai ajab rang zamin par

ghungru ki pari an ke phir kan mein jhankar

sarangi hui bain tamburon ki madadgar

tablon ke thuke tabal ye sazon ke baje tar

ragon ke kahin ghul kahin nachon ke bandhe tar

dholak kahin jhanakare hai mirdang zamin par

holi ne machaya hai ajab rang zamin par

masti mein utha ankh jidhar dekho ahaha

nache hai tawaif kahin matke hai bhawayya

chalte hain kahin jam kahin sawang ka charcha

o rang ko galiyon mein jo dekho to har ik ja

bahti hain umand kar jaman-o-gang zamin par

holi ne machaya hai ajab rang zamin par

bhage hai kahin rang kisi par jo koi dal

wo potli mare hai use daur ke filhal

ye tang ghasite hai to wo khinche pakar bal

wo hath marore to ye tore hai khara gal

is dhab ke har ik ja pe mache dhang zamin par

holi ne machaya hai ajab rang zamin par

baithe hain sab apas mein nahin ek bhi karwa

puchkari utha kar koi jhamkawe hai kharwa

bharte hain kahin mushk kahin rang ka garwa

kya shad wo hota hai jise kahte hain bharwa

sunne mein yahan tak nahin ab nang zamin par

holi ne machaya hai ajab rang zamin par

holi ki nazir ab jo baharen hain ahaha

mahbub rangilon ki qataren hain ahaha

kapron pe jami rang ki dharen hain ahaha

sab holi hai holi hi pukare hain ahaha

kya aish hai kya rang hai kya dhang zamin par

holi ne machaya hai ajab rang zamin par