ہولی (نظیر اکبر آبادی, I)

آ دھمکے عیش و طرب کیا کیا جب حسن دکھایا ہولی نے

ہر آن خوشی کی دھوم ہوئی یوں لطف جتایا ہولی نے

ہر خاطر کو خورسند کیا ہر دل کو لبھایا ہولی نے

دف رنگیں نقش سنہری کا جس وقت بجایا ہولی نے

بازار گلی اور کوچوں میں غل شور مچایا ہولی نے

یا سوانگ کہوں یا رنگ کہوں یا حسن بتاؤں ہولی کا

سب ابرن تن پر جھمک رہا اور کیسر کا ماتھے ٹیکا

ہنس دینا ہر دم ناز بھرا دکھلانا سج دھج شوخی کا

ہر گالی، مصری، قند بھری، ہر ایک قدم اٹکھیلی کا

دل شاد کیا اور موہ لیا یہ، جوبن پایا ہولی نے

کچھ طبلے کھٹکے تال بجے کچھ ڈھولک اور مردنگ بجی

کچھ جھڑپیں بین ربابوں کی کچھ سارنگی اور چنگ بجی

کچھ تار طنبوروں کے جھنکے، کچھ ڈھمڈھی اور منہ چنگ بجی

کچھ گھنگرو کھٹکے جھم جھم جھم کچھ گت گت پر آہنگ بجی

ہے ہر دم ناچنے گانے کا یہ تار بندھایا ہولی نے

ہر جاگہ تھال گلالوں سے، خوش رنگت کی گل کاری ہے

اور ڈھیر ابیروں کے لاگے، سو عشرت کی تیاری ہے

ہیں راگ بہاریں دکھلاتے اور رنگ بھری پچکاری ہے

منہ سرخی سے گل نار ہوئے تن کیسر کی سی کیاری ہے

یہ روپ جھمکتا دکھلایا یہ رنگ دکھایا ہولی نے

ہر آن خوشی سے آپس میں سب ہنس ہنس رنگ چھڑکتے ہیں

رخسار گلالوں سے گل گوں، کپڑوں سے رنگ ٹپکتے ہیں

کچھ راگ اور رنگ جھمکتے ہیں کچھ مے کے جام چھلکتے ہیں

کچھ کودے ہیں، کچھ اچھلے ہیں، کچھ ہنستے ہیں، کچھ بکتے ہیں

یہ طور یہ نقشا عشرت کا ہر آن بنایا ہولی نے

a dhamke aish-o-tarab kya kya jab husn dikhaya holi ne

har an khushi ki dhum hui yun lutf jataya holi ne

har khatir ko khursand kiya har dil ko lubhaya holi ne

daf rangin naqsh sunahri ka jis waqt bajaya holi ne

bazar gali aur kuchon mein ghul shor machaya holi ne

ya sawang kahun ya rang kahun ya husn bataun holi ka

sab abran tan par jhamak raha aur kesar ka mathe teka

hans dena har dam naz bhara dikhlana saj dhaj shokhi ka

har gali, misri, qand bhari, har ek qadam atkheli ka

dil shad kiya aur moh liya ye, joban paya holi ne

kuchh table khatke tal baje kuchh dholak aur mirdang baji

kuchh jharpen bain rababon ki kuchh sarangi aur chinag baji

kuchh tar tamburon ke jhunke, kuchh dhamudhi aur munh chang baji

kuchh ghungru khatke jhim jhim jhim kuchh gat gat par ahang baji

hai har dam nachne gane ka ye tar bandhaya holi ne

har jagah thal gulalon se, khush rangat ki gul kari hai

aur dher aberon ke lage, so ishrat ki tayyari hai

hain rag baharen dikhlate aur rang bhari puchkari hai

munh surkhi se gul nar hue tan kesar ki si kiyari hai

ye rup jhamakta dikhlaya ye rang dikhaya holi ne

har an khushi se apas mein sab hans hans rang chhirakte hain

rukhsar gulalon se gul gun, kapron se rang tapakte hain

kuchh rag aur rang jhamakte hain kuchh mai ke jam chhalakte hain

kuchh kude hain, kuchh uchhle hain, kuchh hanste hain, kuchh bikte hain

ye tur ye naqsha ishrat ka har an banaya holi ne