تعریف اس خدا کی جس نے جہاں بنایا

تعریف اس خدا کی جس نے جہاں بنایا

کیسی زمیں بنائی ، کیا آسماں بنایا

پانوں تلے بچھایا کیا خوب فرش خاکی

اور سر پہ لاجوردی اک سائباں بنایا

مٹی سے بیل بو نٹے کیا خوش نما اگائے ،

پہنا کے سبز خلعت ان کو جواں بنایا

خوش رنگ اور خوشبو گل پھول ہیں کھلائے

اس خاک کے کھنڈر کو کیا گلستاں بنایا

میوے لگائے کیا کیا خوش ذائقہ رسیلے

چکھنے سے جن کے مجھ کو شیریں دہان بنایا

سورج سے ہم نے پائی گرمی بھی روشنی بھی

کیا خوب چشمہ تو نے اے مہرباں بنایا

سورج بنا کے تو نے رونق جہاں کو بخشی

رہنے کو یہ ہمارے اچھا مکاں بنایا

پیاسی زمیں کے منہ میں مینھ کا چوایا پانی

اور بادلوں کو تو نے مینھ کا نشاں بنایا

یہ پیاری پیاری چڑیاں پھرتی ہیں جو چہکتی

قدرت نے تیری ان کو تسبیح خواں بنایا

تنکے اٹھا اٹھا کر لائیں کہاں کہاں سے

کس خوبصورتی سے پھر آشیاں بنایا

اونچی اڑیں ہوا میں بچوں کو پر نہ بھولیں

ان بے پروں کا ان کو روزی رساں بنایا

کیا دودھ دینے والی گائیں بنائیں تو نے

چڑھنے کو میرے گھوڑا کیا خوش عناں بنایا

رحمت سے تیری کیا کیا ہیں نعمتیں میسر

ان نعمتوں کا مجھ کو ہے قدر داں بنایا

آب رواں کے اندر مچھلی بنائی تو نے

مچھلی کے تیرنے کو آب رواں بنایا

ہر چیز سے ہے تیری کاری گری ٹپکتی

یہ کارخانہ تو نے کب رائے گاں بنایا

taarif is khuda ki jis ne jahan banaya

kaisi zamin banai, kya asman banaya

panon tale bichhaya kya khub farsh-e-khaki

aur sar pe lajwardi ik saiban banaya

mitti se bel bu nate kya khush numa ugae,

pahna ke sabz khilat un ko jawan banaya

khush rang aur khushbu gul phul hain khilae

is khak ke khandar ko kya gulistan banaya

mewe lagae kya kya khush zaiqa rasile

chakhne se jin ke mujh ko shirin dahan banaya

suraj se ham ne pai garmi bhi raushni bhi

kya khub chashma tu ne ai mehrban banaya

suraj bana ke tu ne raunaq jahan ko bakhshi

rahne ko ye hamare achchha makan banaya

pyasi zamin ke munh mein minh ka chiwaya pani

aur badalon ko tu ne minh ka nishan banaya

ye pyari pyari chiriyan phirti hain jo chahakti

qudrat ne teri un ko tasbih khwan banaya

tinke utha utha kar laen kahan kahan se

kis khubsurati se phir ashiyan banaya

unchi uren hawa mein bachchon ko par na bhulen

un be paron ka un ko rozi rasan banaya

kya dudh dene wali gaen banaen tu ne

charhne ko mere ghora kya khush inan banaya

rahmat se teri kya kya hain nematen muyassar

in nematon ka mujh ko hai qadr dan banaya

ab-e-rawan ke andar machhli banai tu ne

machhli ke tairne ko ab-e-rawan banaya

har chiz se hai teri kari giri tapakti

ye karkhana tu ne kab rae gan banaya