ہمیں پینے پلانے کا مزا اب تک نہیں آیا

ہمیں پینے پلانے کا مزا اب تک نہیں آیا

کہ بزم مے میں کوئی پارسا اب تک نہیں آیا

ستم بھی لطف ہو جاتا ہے بھولے پن کی باتوں سے

تجھے اے جان انداز جفا اب تک نہیں آیا

دم آخر تھے بالیں پہ جو آنے کو وہ آئے بھی

تو ہنس کر کہہ گئے وقت دعا اب تک نہیں آیا

سحر ہوتے بجھائے کون اے شمع لحد تجھ کو

کوئی جھونکا نسیم صبح کا اب تک نہیں آیا

خدا جانے ہوا کیا کوچۂ جاناں میں دل جا کر

مرا بھولا ہوا بھٹکا ہوا اب تک نہیں آیا

گیا تھا کہہ کے یہ قاصد کہ الٹے پاؤں آتا ہوں

کہاں کمبخت جا کر مر رہا اب تک نہیں آیا

جسے تم کوستے ہو عمر اس کی اور بڑھتی ہے

تمہیں سب کچھ تو آیا کوسنا اب تک نہیں آیا

ستم کرنا دغا کرنا کہ وعدے کا وفا کرنا

بتاؤ کیا تمہیں آیا ہے کیا اب تک نہیں آیا

کسی نے کوئی دشمن میں چھپا ڈالا مٹا ڈالا

گلی تو آئی ان کا نقش پا اب تک نہیں آیا

یہ کیا انصاف ہے صیاد چھوڑے قید سے مجھ کو

کہ ایسا کوئی مرغ خوش نوا اب تک نہیں آیا

بتا دیں آ گیا کیا تم کو اس اٹھتی جوانی میں

بتا دیں کان میں چپکے سے کیا اب تک نہیں آیا

بتان نازنیں جب دیکھتے ہیں مجھ سے کہتے ہیں

تمہاری جان پر قہر خدا اب تک نہیں آیا

کیا حسرت سے رخصت صبح کے تاروں کو یہ کہہ

کہ جس کا شام سے تھا آسرا اب تک نہیں آیا

یہ غفلت ہے کہ محشر میں بھی آنکھیں بند ہیں میری

سمجھتا ہوں یہی روز جزا اب تک نہیں آیا

نہ پھوٹی کوئی کوپل تک مری شاخ نشیمن میں

خزاں کے بعد موسم دوسرا اب تک نہیں آیا

دیا ہو تو دیا ہو کچھ پیام شوق آنکھوں نے

مرے لب پر تو حرف مدعا اب تک نہیں آیا

اس ابھرے ابھرے جوبن پر یوں ہی وہ بیٹھے رہ جاتے

انہیں اٹھتی جوانی کا مزا اب تک نہیں آیا

وہ دن آئے مرے سرکار اہل بزم سے پوچھیں

کہاں ہے کیوں ریاضؔ خوش نوا اب تک نہیں آیا

hamen pine pilane ka maza ab tak nahin aya

ke bazm-e-mai mein koi parsa ab tak nahin aya

sitam bhi lutf ho jata hai bhule pan ki baton se

tujhe ai jan andaz-e-jafa ab tak nahin aya

dam-e-akhir the balin pe jo ane ko wo ae bhi

tu hans kar kah gae waqt-e-dua ab tak nahin aya

sahar hote bujhae kaun ai sham-e-lahad tujh ko

koi jhonka nasim-e-subh ka ab tak nahin aya

khuda jane hua kya kucha-e-janan mein dil ja kar

mira bhula hua bhatka hua ab tak nahin aya

gaya tha kah ke ye qasid ke ulte paon ata hun

kahan kambakht ja kar mar raha ab tak nahin aya

jise tum koste ho umr us ki aur barhti hai

tumhen sab kuchh to aya kosna ab tak nahin aya

sitam karna dagha karna ke waade ka wafa karna

batao kya tumhen aya hai kya ab tak nahin aya

kisi ne koi dushman mein chhupa dala mita dala

gali to ai un ka naqsh-e-pa ab tak nahin aya

ye kya insaf hai sayyad chhore qaid se mujh ko

ke aisa koi murgh-e-khush nawa ab tak nahin aya

bata den a gaya kya tum ko is uthti jawani mein

bata den kan mein chupke se kya ab tak nahin aya

butan-e-naznin jab dekhte hain mujh se kahte hain

tumhari jan par qahr-e-khuda ab tak nahin aya

kya hasrat se rukhsat subh ke taron ko ye kah

ke jis ka sham se tha asra ab tak nahin aya

ye ghaflat hai ke mahshar mein bhi ankhen band hain meri

samajhta hun yahi roz-e-jaza ab tak nahin aya

na phuti koi kopal tak miri shakh-e-nasheman mein

khizan ke baad mausam dusra ab tak nahin aya

diya ho to diya ho kuchh payam-e-shauq ankhon ne

mire lab par to harf-e-muddaa ab tak nahin aya

is ubhre ubhre joban par yun hi wo baithe rah jate

unhen uthti jawani ka maza ab tak nahin aya

wo din ae mire sarkar ahl-e-bazm se puchhen

kahan hai kyun riyaz-e-khush nawa ab tak nahin aya