ہندی مکتب

اقبالؔ! یہاں نام نہ لے علمِ خودی کا

موزُوں نہیں مکتب کے لیے ایسے مقالات

بہتر ہے کہ بیچارے ممولوں کی نظر سے

پوشیدہ رہیں باز کے احوال و مقامات

آزاد کی اک آن ہے محکوم کا اک سال

کس درجہ گراں سَیر ہیں محکوم کے اوقات!

آزاد کا ہر لحظہ پیامِ اَبدیّت

محکوم کا ہر لحظہ نئی مرگِ مفاجات

آزاد کا اندیشہ حقیقت سے منوّر

محکوم کا اندیشہ گرفتارِ خُرافات

محکوم کو پِیروں کی کرامات کا سودا

ہے بندۂ آزاد خود اک زندہ کرامات

محکوم کے حق میں ہے یہی تربِیَت اچھی

موسیقی و صُورت گری و علمِ نباتات!

iqbal! yahan nam na le ilm-e-khudi ka

mauzun nahin maktab ke liye aise maqalat

behtar hai ke bechare mamolon ki nazar se

poshida rahen baz ke ahwal-o-maqamat

azad ki ik an hai mahkum ka ik sal

kis darja giran sair hain mahkum ke auqat!

azad ka har lahza payam-e-abadiyyat

mahkum ka har lahza nai marg-e-mufajat

azad ka andesha haqiqat se munawwar

mahkum ka andesha giraftar-e-khurafat

mahkum ko piron ki karamat ka sauda

hai banda-e-azad khud ik zinda karamat

mahkum ke haq mein hai yahi tarbiyat achchhi

mausiqi-o-surat giri-o-ilm-e-nabatat!