Arooz is now on the App Store, for iPhone and iPad. Download →

All poetry

ہم نے تری خاطر سے دل زار بھی چھوڑا

Bahadur Shah Zafar (1775–1862)

ہم نے تری خاطر سے دل زار بھی چھوڑا

تو بھی نہ ہوا یار اور اک یار بھی چھوڑا

کیا ہوگا رفوگر سے رفو میرا گریبان

اے دست جنوں تو نے نہیں تار بھی چھوڑا

دیں دے کے گیا کفر کے بھی کام سے عاشق

تسبیح کے ساتھ اس نے تو زنار بھی چھوڑا

گوشہ میں تری چشم سیہ مست کے دل نے

کی جب سے جگہ خانۂ خمار بھی چھوڑا

اس سے ہے غریبوں کو تسلی کہ اجل نے

مفلس کو جو مارا تو نہ زردار بھی چھوڑا

ٹیڑھے نہ ہو ہم سے رکھو اخلاص تو سیدھا

تم پیار سے رکتے ہو تو لو پیار بھی چھوڑا

کیا چھوڑیں اسیران محبت کو وہ جس نے

صدقے میں نہ اک مرغ گرفتار بھی چھوڑا

پہنچی مری رسوائی کی کیونکر خبر اس کو

اس شوخ نے تو دیکھنا اخبار بھی چھوڑا

کرتا تھا جو یاں آنے کا جھوٹا کبھی اقرار

مدت سے ظفرؔ اس نے وہ اقرار بھی چھوڑا