ہم سے وفا کریں کہ وہ ہم پر جفا کریں

ہم سے وفا کریں کہ وہ ہم پر جفا کریں

پائیں خدا سے ہم جو بتوں سے دغا کریں

صیاد اڑا دیا مجھے سر سے اتار کر

صدقے ترے ہما ترے سر پر اڑا کریں

وہ دن خدا دکھائے کہ ہم بھی انہیں ستائیں

یہ نازنیں حسین ہمارا گلا کریں

آنکھوں میں اشک آئے تو ہنسنے کا لطف کیا

اتنا نہ گد گداؤ کہ ہم رو دیا کریں

سمجھا دے جا کے تو ہی انہیں اے نگاہ یاس

اب کوسنے کا وقت نہیں ہے دعا کریں

رکھ لیں ہم آپ لاؤ دل بے قرار میں

ایسا نہ ہو کہ تیر تمہارے خطا کریں

ہم لاکھ پارساؤں کے اک پارسا سہی

موقع سے تم کو پائیں تو بتلاؤ کیا کریں

پژمردہ پھول بن کے رہے نا مراد دل

کھل کر تمہارے ہار کی کلیاں ہنسا کریں

وہ دن کہاں ریاضؔ وہ راتیں کہاں ریاضؔ

بیٹھے ہوئے کسی کی بلائیں لیا کریں

ham se wafa karen ke wo ham par jafa karen

paen khuda se ham jo buton se dagha karen

sayyad ura diya mujhe sar se utar kar

sadqe tire huma tire sar par ura karen

wo din khuda dikhae ke ham bhi unhen sataen

ye naznin hasin hamara gila karen

ankhon mein ashk ae to hansne ka lutf kya

itna na gid gadao ke ham ru diya karen

samjha de ja ke tu hi unhen ai nigah-e-yas

ab kosne ka waqt nahin hai dua karen

rakh len ham ap lao dil-e-be qarar mein

aisa na ho ke tir tumhare khata karen

ham lakh parsaon ke ik parsa sahi

mauqaa se tum ko paen to batlao kya karen

pazhmurda phul ban ke rahe na murad-e-dil

khul kar tumhare har ki kaliyan hansa karen

wo din kahan riyaz wo raten kahan riyaz

baithe hue kisi ki balaen liya karen