ہم سے کر تو کہ یا نہ کر اخلاص

ہم سے کر تو کہ یا نہ کر اخلاص

ہم کو ہے تجھ سے یار پر اخلاص

اپنے مخلص کی بات کا ہرگز

مت برا مان ہے اگر اخلاص

میرے اور اس کے کیونکہ صحبت ہو

پنبہ سے کب رکھے شرر اخلاص

خون ہو کر بھی تیری طرف بہے

تجھ سے رکھے تھے دل جگر اخلاص

ہے غنیمت رہے جو کوئی دن

ہم میں اور اس میں یک دگر اخلاص

وہ نہیں وقت اب کہ ہر یک میں

دیکھتے تھے جدھر تدھر اخلاص

اس زمانہ میں اے حسنؔ مت پوچھ

ہے محبت کہاں کدھر اخلاص

ham se kar to ke ya na kar ikhlas

ham ko hai tujh se yar par ikhlas

apne mukhlis ki bat ka hargiz

mat bura man hai agar ikhlas

mere aur us ke kyunke sohbat ho

pumba se kab rakhe sharar ikhlas

khun ho kar bhi teri taraf bahe

tujh se rakhe the dil jigar ikhlas

hai ghanimat rahe jo koi din

ham mein aur is mein yak digar ikhlas

wo nahin waqt ab ke har yak mein

dekhte the jidhar tidhr ikhlas

is zamana mein ai husn mat puchh

hai mohabbat kahan kidhar ikhlas