ہم سے کرتے ہو بیاں غیروں کی یاری آن کر

ہم سے کرتے ہو بیاں غیروں کی یاری آن کر

رہ گئی ہے آپ کی یہ دوست داری آن کر

ہم کو آنے سے تمہاری بزم کے کیا تھا حصول

دیکھ لیتے تھے مگر صورت تمہاری آن کر

روٹھنے پر میرے کیا لازم تھا ہو جانا خفا

بلکہ کرنی تھی تمہیں خاطر ہماری آن کر

طعن بد خواہاں سے تو اک دم نہ پاوے گا قرار

کی جو تیرے در پہ ہم نے بے قراری آن کر

تھا اگرچہ غش میں مجنوں لیکن آنکھیں کھل گئیں

سر پہ اس کے جس گھڑی لیلیٰ پکاری آن کر

جس جگر کشتہ کا تیرے لاشہ تھا خوں میں پڑا

خوب سا رویا وہاں ابر بہاری آن کر

میں بھی کیا برگشتہ طالع ہوں کہ تنہاؔ رات کو

پھر گئی در تک مرے اس کی سواری آن کر

ham se karte ho bayan ghairon ki yari an kar

rah gai hai ap ki ye dost dari an kar

ham ko ane se tumhari bazm ke kya tha husul

dekh lete the magar surat tumhari an kar

ruthne par mere kya lazim tha ho jana khafa

balke karni thi tumhen khatir hamari an kar

taan-e-bad khwahan se to ik dam na pawega qarar

ki jo tere dar pe ham ne be qarari an kar

tha agarche ghash mein majnun lekin ankhen khul gain

sar pe us ke jis ghari laila pukari an kar

jis jigar kushta ka tere lasha tha khun mein para

khub sa roya wahan abr-e-bahari an kar

main bhi kya bargashta tale hun ke tanha rat ko

phir gai dar tak mire us ki sawari an kar