جان آنکھوں میں رہی جی سے گزرنے نہ دیا

جان آنکھوں میں رہی جی سے گزرنے نہ دیا

اچھی دیدار کی حسرت تھی کہ مرنے نہ دیا

کیا قیامت ہے ستم گار بھری محفل میں

دل چرا کر تری دزدیدہ نظر نے نہ دیا

مدتوں کش مکش یاس و تمنا میں رہے

غم نے جینے نہ دیا شوق نے مرنے نہ دیا

ناخدا نے مجھے دلدل میں پھنسائے رکھا

ڈوب مرنے نہ دیا پار اترنے نہ دیا

کوئی تو بات ہے جو غیر کے آگے اس نے

شکوہ کیسا کہ مجھے شکر بھی کرنے نہ دیا

خاک آرام کی خواہش ہو وطن سے باہر

جب ہمیں چین تپشؔ اپنے ہی گھر نے نہ دیا

jan ankhon mein rahi ji se guzarne na diya

achchhi didar ki hasrat thi ke marne na diya

kya qayamat hai sitam gar bhari mahfil mein

dil chura kar tiri duzdida nazar ne na diya

muddaton kash-e-maksh yas-o-tamanna mein rahe

gham ne jine na diya shauq ne marne na diya

nakhuda ne mujhe daldal mein phansae rakha

dub marne na diya par utarne na diya

koi to bat hai jo ghair ke age us ne

shikwa kaisa ke mujhe shukr bhi karne na diya

khak aram ki khwahish ho watan se bahar

jab hamen chain tapish apne hi ghar ne na diya