ہزاروں آرزوئیں ساتھ ہیں اس پر اکیلی ہے

ہزاروں آرزوئیں ساتھ ہیں اس پر اکیلی ہے

ہماری روح بے بوجھی ہوئی اب تک پہیلی ہے

بڑھاپا ہو تو ہو اس ربط میں کیوں کر خلل آئے

مری یاس و تمنا بچپنے سے ساتھ کھیلی ہے

اجل بھی ٹل گئی دیکھی گئی حالت نہ آنکھوں سے

شب غم میں مصیبت سی مصیبت ہم نے جھیلی ہے

عدم کا تھا سفر جب اور کچھ توشہ نہ ہاتھ آیا

بہت سی آرزو چلتے چلاتے ساتھ لے لی ہے

ذرا دیکھو تو ان اترے ہوئے چہروں کو پھولوں کے

معاذ اللہ جھونکا ہے خزاں کا یا کہ سیلی ہے

کبھی جمنے نہ دیتی بے خودی خاطر پہ نقش ان کا

بہ مشکل میں نے یہ تصویر اسی عیار سے لی ہے

ہماری اور گلوں کی ایک ہے نشوونما لیکن

وہاں مٹھی میں زر ہے اور یہاں خالی ہتھیلی ہے

نہ پوچھو شادؔ ویرانی کو دل کی کیا بتاؤں میں

تمنا جا چکی حسرت غریب اس میں اکیلی ہے

hazaron arzuen sath hain us par akeli hai

hamari ruh be bujhi hui ab tak paheli hai

burhapa ho to ho is rabt mein kyun kar khalal ae

miri yas-o-tamanna bachpane se sath kheli hai

ajal bhi tal gai dekhi gai halat na ankhon se

shab-e-gham mein musibat si musibat ham ne jheli hai

adam ka tha safar jab aur kuchh tosha na hath aya

bahut si arzu chalte chillate sath le li hai

zara dekho to un utre hue chehron ko phulon ke

maaz allah jhonka hai khizan ka ya ke sili hai

kabhi jamne na deti be khudi khatir pe naqsh un ka

ba mushkil main ne ye taswir isi ayyar se li hai

hamari aur gulon ki ek hai nashwonuma lekin

wahan mutthi mein zar hai aur yahan khali hatheli hai

na puchho shad wirani ko dil ki kya bataun main

tamanna ja chuki hasrat gharib is mein akeli hai