ہم تری خاطر نازک سے خطر کرتے ہیں

ہم تری خاطر نازک سے خطر کرتے ہیں

ورنہ نالے تو یہ پتھر میں اثر کرتے ہیں

دل و دیں تھا سو لیا اور بھی کچھ مطلب ہے

بار بار آپ جو ایدھر کو نظر کرتے ہیں

فائدہ کیا ہے اگر شرق سے تا غرب پھرے

راہرو وے ہیں جو ہستی سے سفر کرتے ہیں

ہم تو ہر شکل میں یاں آئنہ خانے کی مثال

آپ ہی آتے ہیں نظر سیر جدھر کرتے ہیں

کیا ہو گر کوئی گھڑی یاں بھی کرم فرماؤ

آپ اس راہ سے آخر تو گزر کرتے ہیں

تیرے ایام فراق اے صنم مہر گسل

آہ مت پوچھ کہ کس طرح بسر کرتے ہیں

دن کو پھرتے ہیں تجھے ڈھونڈنے اور رات تمام

شمع کی طرح سے رو رو کے سحر کرتے ہیں

بس نہیں خوب کہ ایسے کو دل اپنا دیجے

آگے تو جان میاں ہم تو خبر کرتے ہیں

یہ وہی فتنۂ آشوب جہاں ہے بیدارؔ

دیکھ کر پیر و جواں جس کو حذر کرتے ہیں

ham tiri khatir-e-nazuk se khatar karte hain

warna nale to ye patthar mein asar karte hain

dil-o-din tha so liya aur bhi kuchh matlab hai

bar bar ap jo idhar ko nazar karte hain

faida kya hai agar sharq se ta gharb phire

rahrau we hain jo hasti se safar karte hain

ham to har shakl mein yan aina khane ki misal

ap hi ate hain nazar sair jidhar karte hain

kya ho gar koi ghari yan bhi karam farmao

ap is rah se akhir to guzar karte hain

tere ayyam-e-firaq ai sanam mehr gusil

ah mat puchh ke kis tarah basar karte hain

din ko phirte hain tujhe dhundne aur rat tamam

shama ki tarah se ro ro ke sahar karte hain

bas nahin khub ke aise ko dil apna dije

age to jan miyan ham to khabar karte hain

ye wahi fitna-e-ashob-e-jahan hai bedar

dekh kar pir-o-jawan jis ko hazar karte hain