ہسپانیہ

ہسپانیہ تُو خُونِ مسلماں کا امیں ہے

مانندِ حرم پاک ہے تُو میری نظر میں

پوشیدہ تری خاک میں سجدوں کے نشاں ہیں

خاموش اذانیں ہیں تری بادِ سحَر میں

روشن تھیں ستاروں کی طرح ان کی سنانیں

خیمے تھے کبھی جن کے ترے کوہ و کمر میں

پھر تیرے حسینوں کو ضرورت ہے حِنا کی؟

باقی ہے ابھی رنگ مرے خُونِ جگر میں!

کیونکر خس و خاشاک سے دب جائے مسلماں

مانا، وہ تب و تاب نہیں اس کے شرر میں

غرناطہ بھی دیکھا مری آنکھوں نے و لیکن

تسکینِ مسافر نہ سفر میں نہ حضَر میں

دیکھا بھی دِکھایا بھی، سُنایا بھی سُنا بھی

ہے دل کی تسلّی نہ نظر میں، نہ خبر میں!

haspanya tu khun-e-musalman ka amin hai

manind-e-haram pak hai tu meri nazar mein

poshida tiri khak mein sajdon ke nishan hain

khamosh azanen hain tiri bad-e-sahar mein

raushan thin sitaron ki tarah un ki sinanen

kheme the kabhi jin ke tire koh-o-kamar mein

phir tere hasinon ko zarurat hai hina ki?

baqi hai abhi rang mire khun-e-jigar mein!

kyunkar khas-o-khashak se dab jae musalman

mana, wo tab-o-tab nahin us ke sharar mein

gharnata bhi dekha miri ankhon ne-o-lekin

taskin-e-musafir na safar mein na hazar mein

dekha bhi dikhaya bhi, sunaya bhi suna bhi

hai dil ki tasalli na nazar mein, na khabar mein!