ہستی کو تری بس ہے میاں گل کی اشارت

ہستی کو تری بس ہے میاں گل کی اشارت

کافی ہے مرے نالے کو بلبل کی اشارت

فتویٰ طلب اے یار نہ قاضی سے کروں میں

توبہ شکنی کو ہے مری مل کی اشارت

مل بیٹھ میری آنکھوں میں ہے ساعت نیک آج

یہ چشم ترازو ہیں ترے تل کی اشارت

ہے باعث جمعیت دل ایک جہاں کی

اے شوخ پریشانیٔ کاکل کی اشارت

تقویٰ کے نہیں بار سے قد خم ترا اے شیخ

اک خلق میں مشہور ہے اس پل کی اشارت

یاد آئے تری زلف نہ مجھ کو جو چمن میں

دے تاب مرے دل کو نہ سنبل کی اشارت

عشاق کو تجھ چشم کے حاجت نہیں مے کی

بے ہوش کرے سوداؔ کو قلقل کی اشارت

hasti ko tiri bas hai miyan gul ki isharat

kafi hai mire nale ko bulbul ki isharat

fatwa talab ai yar na qazi se karun main

tauba shikani ko hai miri mil ki isharat

mil baith meri ankhon mein hai saat-e-nek aj

ye chashm-e-tarazu hain tire til ki isharat

hai bais-e-jamiyyat dil ek jahan ki

ai shokh pareshani-e-kakul ki isharat

taqwa ke nahin bar se qad-e-kham tira ai shaikh

ik khalq mein mashhur hai is pal ki isharat

yad ae tiri zulf na mujh ko jo chaman mein

de tab mire dil ko na sumbul ki isharat

ushshaq ko tujh chashm ke hajat nahin mai ki

be hosh kare sauda ko qulqul ki isharat