جان و دل ہیں اداس سے میرے

جان و دل ہیں اداس سے میرے

اٹھ گیا کون پاس سے میرے

کوئی بھی اب امید باقی ہے

پوچھیو داغ یاس سے میرے

سب کی عرضی سے خوش ہو تم لیکن

ہو خفا التماس سے میرے

شاید اٹھنے کا قصد تم نے کیا

اڑ چلے کچھ حواس سے میرے

عیش مجھ تک تو پہنچے تب جو ٹلے

فوج غم آس پاس سے میرے

دور ہی دور پھرتے ہیں کچھ بخت

اب تو امید و یاس سے میرے

کیا میں ٹھہراؤں اس کو دل میں حسنؔ

ہے وہ باہر قیاس سے میرے

jan-o-dil hain udas se mere

uth gaya kaun pas se mere

koi bhi ab umid baqi hai

puchhiyo dagh yas se mere

sab ki arzi se khush ho tum lekin

ho khafa iltimas se mere

shayad uthne ka qasd tum ne kiya

ur chale kuchh hawas se mere

aish mujh tak to pahunche tab jo tale

fauj-e-gham as pas se mere

dur hi dur phirte hain kuchh bakht

ab to ummid-o-yas se mere

kya main thahraun us ko dil mein husn

hai wo bahar qayas se mere