جال میں زر کے اگر موتی کا دانا ہوگا

جال میں زر کے اگر موتی کا دانا ہوگا

وہ نہ اس دام میں آوے گا جو دانا ہوگا

دام زلف اور جہاں خال کا دانا ہوگا

پھنس ہی جاوے گا غرض کیسا ہی دانا ہوگا

دل کو ہم لائے تھے مژگاں کی صفیں دکھلانے

یہ نہ سمجھے تھے کہ تیروں کا نشانا ہوگا

آج دیکھ اس نے مری چاہ کی چتون یارو

منہ سے گو کچھ نہ کہا دل میں تو جانا ہوگا

بھر نظر دیکھیں گے اس عہد شکن کی صورت

دیکھیے کون سا یارب وہ زمانا ہوگا

خوں بہانے کا مرے حشر میں جب ہوگا بہا

دیکھیں کیا اس گھڑی قاتل کو بہانا ہوگا

وہ بھی کچھ ایسی ہی کہہ دے گا کہ جس سے اس کو

بات کی بات بہانے کا بہانا ہوگا

تلخیٔ مرگ جسے کہتے ہیں افسوس افسوس

ایک دن سب کے تئیں زہر یہ کھانا ہوگا

دیکھ لے اس چمن دہر کو دل بھر کے نظیرؔ

پھر ترا کاہے کو اس باغ میں آنا ہوگا

jal mein zar ke agar moti ka dana hoga

wo na is dam mein awega jo dana hoga

dam-e-zulf aur jahan khal ka dana hoga

phans hi jawega gharaz kaisa hi dana hoga

dil ko ham lae the mizhgan ki safen dikhlane

ye na samjhe the ke tiron ka nashana hoga

aj dekh us ne miri chah ki chitwan yaro

munh se go kuchh na kaha dil mein to jana hoga

bhar nazar dekhenge is ahd shikan ki surat

dekhiye kaun sa yarab wo zamana hoga

khun bahane ka mire hashr mein jab hoga baha

dekhen kya us ghari qatil ko bahana hoga

wo bhi kuchh aisi hi kah dega ke jis se us ko

bat ki bat bahane ka bahana hoga

talkhi-e-marg jise kahte hain afsos afsos

ek din sab ke tain zahr ye khana hoga

dekh le is chaman-e-dahr ko dil bhar ke nazir

phir tira kahe ko is bagh mein ana hoga