دھوپ تھی صحرا تھا لیکن جسم کا سایہ نہ تھا

دھوپ تھی صحرا تھا لیکن جسم کا سایہ نہ تھا

آدمی اس سے زیادہ تو کبھی تنہا نہ تھا

کھینچتے تھے اپنی جانب ریگزاروں کے سراب

دور تک صحرا میں لیکن آب کا قطرہ نہ تھا

ایک مبہم خواب تھا آنکھوں میں اور دل میں جنوں

ذہن میں لیکن عمارت کا کوئی نقشہ نہ تھا

بھیڑ تھی بستی میں لیکن میں کسے پہچانتا

اتنے لوگوں میں کسی بھی شخص کا چہرہ نہ تھا

اس قدر شدت سے وہ دریا سمندر سے ملا

اب سمندر ہی سمندر تھا کہیں دریا نہ تھا

گھر کی عظمت ہائے جس دیوار سے محفوظ تھی

گھر کے دروازے پے اب وہ ٹاٹ کا پردہ نہ تھا

وہ غزل اپنی سجاتا تھا لہو کے رنگ سے

پھر بھی کہتے ہیں نفسؔ اس کا کوئی پیشہ نہ تھا

dhup thi sahra tha lekin jism ka saya na tha

admi is se ziyada to kabhi tanha na tha

khinchte the apni janib regzaron ke sarab

dur tak sahra mein lekin ab ka qatra na tha

ek mubham khwab tha ankhon mein aur dil mein junun

zehn mein lekin imarat ka koi naqsha na tha

bhir thi basti mein lekin main kise pahchanta

itne logon mein kisi bhi shakhs ka chehra na tha

is qadar shiddat se wo dariya samundar se mila

ab samundar hi samundar tha kahin dariya na tha

ghar ki azmat hae jis diwar se mahfuz thi

ghar ke darwaze pe ab wo tat ka parda na tha

wo ghazal apni sajata tha lahu ke rang se

phir bhi kahte hain nafas us ka koi pesha na tha