طور تھا کعبہ تھا دل تھا جلوہ زار یار تھا — فراق گورکھپوری (Firaq Gorakhpuri)

طور تھا کعبہ تھا دل تھا جلوہ زار یار تھا

عشق سب کچھ تھا مگر پھر عالم اسرار تھا

نشۂ صد جام کیف انتظار یار تھا

ہجر میں ٹھہرا ہوا دل ساغر سرشار تھا

الوداع اے بزم انجم ہجر کی شب الفراق

تا بہ دور‌ زندگانی انتظار یار تھا

ایک ادا سے بے نیاز قرب و دوری کر دیا

ماورائے وصل و ہجراں حسن کا اقرار تھا

جوہر آئینۂ عالم بنے آنسو مرے

یوں تو سچ یہ ہے کہ رونا عشق میں بے کار تھا

شوخئ رفتار وجہ ہستئ برباد تھی

زندگی کیا تھی غبار رہ گزار یار تھا

الفت دیرینہ کا جب ذکر اشاروں میں کیا

مسکرا کر مجھ سے پوچھا تم کو کس سے پیار تھا

دل دکھے روئے ہیں شاید اس جگہ اے کوئے دوست

خاک کا اتنا چمک جانا ذرا دشوار تھا

ذرہ ذرہ آئنہ تھا خود نمائی کا فراقؔ

سر بسر صحرائے عالم جلوہ زار یار تھا