نگاہ ناز نے پردے اٹھائے ہیں کیا کیا

نگاہ ناز نے پردے اٹھائے ہیں کیا کیا

حجاب اہل محبت کو آئے ہیں کیا کیا

جہاں میں تھی بس اک افواہ تیرے جلووں کی

چراغ دیر و حرم جھلملائے ہیں کیا کیا

دو چار برق تجلی سے رہنے والوں نے

فریب نرم نگاہی کے کھائے ہیں کیا کیا

دلوں پہ کرتے ہوئے آج آتی جاتی چوٹ

تری نگاہ نے پہلو بچائے ہیں کیا کیا

نثار نرگس مے گوں کہ آج پیمانے

لبوں تک آئے ہوئے تھرتھرائے ہیں کیا کیا

وہ اک ذرا سی جھلک برق کم نگاہی کی

جگر کے زخم نہاں مسکرائے ہیں کیا کیا

چراغ طور جلے آئنہ در آئینہ

حجاب برق ادا نے اٹھائے ہیں کیا کیا

بقدر ذوق نظر دید حسن کیا ہو مگر

نگاہ شوق میں جلوے سمائے ہیں کیا کیا

کہیں چراغ کہیں گل کہیں دل برباد

خرام ناز نے فتنے اٹھائے ہیں کیا کیا

تغافل اور بڑھا اس غزال رعنا کا

فسون غم نے بھی جادو جگائے ہیں کیا کیا

ہزار فتنۂ بیدار خواب رنگیں میں

چمن میں غنچۂ گل رنگ لائے ہیں کیا کیا

ترے خلوص نہاں کا تو آہ کیا کہنا

سلوک اچٹے بھی دل میں سمائے ہیں کیا کیا

نظر بچا کے ترے عشوہ ہائے پنہاں نے

دلوں میں درد محبت اٹھائے ہیں کیا کیا

پیام حسن پیام جنوں پیام فنا

تری نگہ نے فسانے سنائے ہیں کیا کیا

تمام حسن کے جلوے تمام محرومی

بھرم نگاہ نے اپنے گنوائے ہیں کیا کیا

فراقؔ راہ وفا میں سبک روی تیری

بڑے بڑوں کے قدم ڈگمگائے ہیں کیا کیا

nigah-e-naz ne parde uthae hain kya kiya

hijab ahl-e-mohabbat ko ae hain kya kiya

jahan mein thi bas ik afwah tere jalwon ki

charagh-e-dair-o-haram jhilmilae hain kya kiya

do char barq-e-tajalli se rahne walon ne

fareb-e-narm nigahi ke khae hain kya kiya

dilon pe karte hue aj ati jati chot

tiri nigah ne pahlu bachae hain kya kiya

nisar nargis-e-mai gun ke aj paimane

labon tak ae hue thartharae hain kya kiya

wo ik zara si jhalak barq kam nigahi ki

jigar ke zakhm-e-nihan muskurae hain kya kiya

charagh-e-tur jale aina dar aina

hijab barq ada ne uthae hain kya kiya

baqadr-e-zauq-e-nazar did husn kya ho magar

nigah-e-shauq mein jalwe samae hain kya kiya

kahin charagh kahin gul kahin dil-e-barbad

khiram-e-naz ne fitne uthae hain kya kiya

taghaful aur barha is ghazal-e-raana ka

fusun-e-gham ne bhi jadu jagae hain kya kiya

hazar fitna-e-bedar khwab rangin mein

chaman mein ghuncha-e-gul rang lae hain kya kiya

tire khulus-e-nihan ka to ah kya kahna

suluk achte bhi dil mein samae hain kya kiya

nazar bacha ke tire ishwa ha-e-pinhan ne

dilon mein dard-e-mohabbat uthae hain kya kiya

payam-e-husn payam-e-junun payam-e-fana

tiri nigah ne fasane sunae hain kya kiya

tamam husn ke jalwe tamam mahrumi

bharam nigah ne apne ganwae hain kya kiya

firaq rah-e-wafa mein subuk rawi teri

bare baron ke qadam dagmagae hain kya kiya