کوئی پیغام محبت لب اعجاز تو دے

کوئی پیغام محبت لب اعجاز تو دے

موت کی آنکھ بھی کھل جائے گی آواز تو دے

مقصد عشق ہم آہنگیٔ جزو و کل ہے

درد ہی درد سہی دل بوئے دم ساز تو دے

چشم مخمور کے عنوان نظر کچھ تو کھلیں

دل رنجور دھڑکنے کا کچھ انداز تو دے

اک ذرا ہو نشۂ حسن میں انداز خمار

اک جھلک عشق کے انجام کی آغاز تو دے

جو چھپائے نہ چھپے اور بتائے نہ بنے

دل عاشق کو ان آنکھوں سے کوئی راز تو دے

منتظر اتنی کبھی تھی نہ فضائے آفاق

چھیڑنے ہی کو ہوں پر درد غزل ساز تو دے

ہم اسیران قفس آگ لگا سکتے ہیں

فرصت نغمہ کبھی حسرت پرواز تو دے

عشق اک بار مشیت کو بدل سکتا ہے

عندیہ اپنا مگر کچھ نگہ ناز تو دے

قرب و دیدار تو معلوم کسی کا پھر بھی

کچھ پتہ سا فلک تفرقہ پرداز تو دے

منزلیں گرد کی مانند اڑی جاتی ہیں

ابلق دہر کچھ انداز تگ و تاز تو دے

کان سے ہم تو فراقؔ آنکھ کا لیتے ہیں کام

آج چھپ کر کوئی آواز پر آواز تو دے

koi paigham-e-mohabbat lab-e-ejaz to de

maut ki ankh bhi khul jaegi awaz to de

maqsad-e-ishq ham ahangi-e-juzw-o-kal hai

dard hi dard sahi dil bu-e-dam saz to de

chashm-e-makhmur ke unwan nazar kuchh to khulen

dil-e-ranjur dharakne ka kuchh andaz to de

ik zara ho nasha-e-husn mein andaz-e-khumar

ik jhalak ishq ke anjam ki aghaz to de

jo chhupae na chhupe aur batae na bane

dil-e-ashiq ko in ankhon se koi raz to de

muntazir itni kabhi thi na faza-e-afaq

chherne hi ko hun pur dard ghazal saz to de

ham asiran qafas ag laga sakte hain

fursat-e-naghma kabhi hasrat-e-parwaz to de

ishq ik bar mashiyyat ko badal sakta hai

indiyya apna magar kuchh nigah-e-naz to de

qurb-o-didar to maalum kisi ka phir bhi

kuchh pata sa falak-e-tafriqa pardaz to de

manzilen gard ki manind uri jati hain

ablaq-e-dahr kuchh andaz-e-tag-o-taz to de

kan se ham to firaq ankh ka lete hain kam

aj chhup kar koi awaz par awaz to de