وہ چپ چاپ آنسو بہانے کی راتیں

وہ چپ چاپ آنسو بہانے کی راتیں

وہ اک شخص کے یاد آنے کی راتیں

شب مہ کی وہ ٹھنڈی آنچیں وہ شبنم

ترے حسن کے رسمسانے کی راتیں

جوانی کی دوشیزگی کا تبسم

گل زار کے وہ کھلانے کی راتیں

پھواریں سی نغموں کی پڑتی ہوں جیسے

کچھ اس لب کے سننے سنانے کی راتیں

مجھے یاد ہے تیری ہر صبح رخصت

مجھے یاد ہیں تیرے آنے کی راتیں

پر اسرار سی میری عرض تمنا

وہ کچھ زیر لب مسکرانے کی راتیں

سر شام سے رتجگا کے وہ ساماں

وہ پچھلے پہر نیند آنے کی راتیں

سر شام سے تا سحر قرب جاناں

نہ جانے وہ تھیں کس زمانے کی راتیں

سر میکدہ تشنگی کی وہ قسمیں

وہ ساقی سے باتیں بنانے کی راتیں

ہم آغوشیاں شاہد مہرباں کی

زمانے کے غم بھول جانے کی راتیں

فراقؔ اپنی قسمت میں شاید نہیں تھے

ٹھکانے کے دن یا ٹھکانے کی راتیں

wo chup chap ansu bahane ki raten

wo ik shakhs ke yad ane ki raten

shab-e-mah ki wo thandi anchen wo shabnam

tire husn ke rasumasane ki raten

jawani ki doshizagi ka tabassum

gul zar ke wo khilane ki raten

phuaren si naghmon ki parti hun jaise

kuchh us lab ke sunne sunane ki raten

mujhe yad hai teri har subh-e-rukhsat

mujhe yad hain tere ane ki raten

pur asrar si meri arz-e-tamanna

wo kuchh zer-e-lab muskurane ki raten

sar-e-sham se ratjaga ke wo saman

wo pichhle pahar nind ane ki raten

sar-e-sham se ta sahar qurb-e-janan

na jane wo thin kis zamane ki raten

sar-e-maikada tishnagi ki wo qasmen

wo saqi se baten banane ki raten

ham aghoshiyan shahid-e-mehrban ki

zamane ke gham bhul jane ki raten

firaq apni qismat mein shayad nahin the

thikane ke din ya thikane ki raten