نرم فضا کی کروٹیں دل کو دکھا کے رہ گئیں

نرم فضا کی کروٹیں دل کو دکھا کے رہ گئیں

ٹھنڈی ہوائیں بھی تری یاد دلا کے رہ گئیں

شام بھی تھی دھواں دھواں حسن بھی تھا اداس اداس

دل کو کئی کہانیاں یاد سی آ کے رہ گئیں

مجھ کو خراب کر گئیں نیم نگاہیاں تری

مجھ سے حیات و موت بھی آنکھیں چرا کے رہ گئیں

حسن نظر فریب میں کس کو کلام تھا مگر

تیری ادائیں آج تو دل میں سما کے رہ گئیں

تب کہیں کچھ پتہ چلا صدق و خلوص حسن کا

جب وہ نگاہیں عشق سے باتیں بنا کے رہ گئیں

تیرے خرام ناز سے آج وہاں چمن کھلے

فصلیں بہار کی جہاں خاک اڑا کے رہ گئیں

پوچھ نہ ان نگاہوں کی طرفہ کرشمہ سازیاں

فتنے سلا کے رہ گئیں فتنے جگا کے رہ گئیں

تاروں کی آنکھ بھی بھر آئی میری صدائے درد پر

ان کی نگاہیں بھی ترا نام بتا کے رہ گئیں

اف یہ زمیں کی گردشیں آہ یہ غم کی ٹھوکریں

یہ بھی تو بخت خفتہ کے شانے ہلا کے رہ گئیں

اور تو اہل درد کون سنبھالتا بھلا

ہاں تیری شادمانیاں ان کو رلا کے رہ گئیں

یاد کچھ آئیں اس طرح بھولی ہوئی کہانیاں

کھوے ہوئے دلوں میں آج درد اٹھا کے رہ گئیں

ساز نشاط زندگی آج لرز لرز اٹھا

کس کی نگاہیں عشق کا درد سنا کے رہ گئیں

تم نہیں آئے اور رات رہ گئی راہ دیکھتی

تاروں کی محفلیں بھی آج آنکھیں بچھا کے رہ گئیں

جھوم کے پھر چلیں ہوائیں وجد میں آئیں پھر فضائیں

پھر تری یاد کی گھٹائیں سینوں پہ چھا کے رہ گئیں

قلب و نگاہ کی یہ عید اف یہ مآل قرب و دید

چرخ کی گردشیں تجھے مجھ سے چھپا کے رہ گئیں

پھر ہیں وہی اداسیاں پھر وہی سونی کائنات

اہل طرب کی محفلیں رنگ جما کے رہ گئیں

کون سکون دے سکا غم زدگان عشق کو

بھیگتی راتیں بھی فراقؔ آگ لگا کے رہ گئیں

narm faza ki karwaten dil ko dikha ke rah gain

thandi hawaen bhi tiri yad dila ke rah gain

sham bhi thi dhuan dhuan husn bhi tha udas udas

dil ko kai kahaniyan yad si a ke rah gain

mujh ko kharab kar gain nim nigahiyan tiri

mujh se hayat-o-maut bhi ankhen chura ke rah gain

husn-e-nazar fareb mein kis ko kalam tha magar

teri adaen aj to dil mein sama ke rah gain

tab kahin kuchh pata chala sidq-o-khulus-e-husn ka

jab wo nigahen ishq se baten bana ke rah gain

tere khiram-e-naz se aj wahan chaman khule

faslen bahar ki jahan khak ura ke rah gain

puchh na un nigahon ki turfa karishma saziyan

fitne sula ke rah gain fitne jaga ke rah gain

taron ki ankh bhi bhar ai meri sada-e-dard par

un ki nigahen bhi tira nam bata ke rah gain

uf ye zamin ki gardishen ah ye gham ki thokaren

ye bhi to bakht-e-khufta ke shane hila ke rah gain

aur to ahl-e-dard kaun sambhalta bhala

han teri shadmaniyan un ko rula ke rah gain

yad kuchh aen is tarah bhuli hui kahaniyan

khawe hue dilon mein aj dard utha ke rah gain

saz-e-nishat-e-zindagi aj laraz laraz utha

kis ki nigahen ishq ka dard suna ke rah gain

tum nahin ae aur rat rah gai rah dekhti

taron ki mahfilen bhi aj ankhen bichha ke rah gain

jhum ke phir chalen hawaen wajd mein aen phir fazaen

phir tiri yad ki ghataen sinon pe chha ke rah gain

qalb-o-nigah ki ye eid uf ye maal-e-qurb-o-did

charkh ki gardishen tujhe mujh se chhupa ke rah gain

phir hain wahi udasiyan phir wahi suni kainat

ahl-e-tarab ki mahfilen rang jama ke rah gain

kaun sukun de saka gham zadagan-e-ishq ko

bhigti raten bhi firaq ag laga ke rah gain