شعور میں کبھی احساس میں بساؤں اسے

شعور میں کبھی احساس میں بساؤں اسے

مگر میں چار طرف بے حجاب پاؤں اسے

اگرچہ فرط حیا سے نظر نہ آؤں اسے

وہ روٹھ جائے تو سو طرح سے مناؤں اسے

طویل ہجر کا یہ جبر ہے کہ سوچتا ہوں

جو دل میں بستا ہے اب ہاتھ بھی لگاؤں اسے

اسے بلا کے ملا عمر بھر کا سناٹا

مگر یہ شوق کہ اک بار پھر بلاؤں اسے

اندھیری رات میں جب راستہ نہیں ملتا

میں سوچتا ہوں کہاں جا کے ڈھونڈ لاؤں اسے

ابھی تک اس کا تصور تو میرے بس میں ہے

وہ دوست ہے تو خدا کس لیے بناؤں اسے

ندیمؔ ترک محبت کو ایک عمر ہوئی

میں اب بھی سوچ رہا ہوں کہ بھول جاؤں اسے

shuur mein kabhi ehsas mein basaun use

magar main char taraf be hijab paon use

agarche fart-e-haya se nazar na aun use

wo ruth jae to sau tarah se manaun use

tawil hijr ka ye jabr hai ke sochta hun

jo dil mein basta hai ab hath bhi lagaun use

use bala ke mila umr bhar ka sannata

magar ye shauq ke ik bar phir bulaun use

andheri rat mein jab rasta nahin milta

main sochta hun kahan ja ke dhund laun use

abhi tak us ka tasawwur to mere bas mein hai

wo dost hai to khuda kis liye banaun use

nadim tark-e-mohabbat ko ek umr hui

main ab bhi soch raha hun ke bhul jaun use