وہ کوئی اور نہ تھا چند خشک پتے تھے

وہ کوئی اور نہ تھا چند خشک پتے تھے

شجر سے ٹوٹ کے جو فصل گل پہ روئے تھے

ابھی ابھی تمہیں سوچا تو کچھ نہ یاد آیا

ابھی ابھی تو ہم اک دوسرے سے بچھڑے تھے

تمہارے بعد چمن پر جب اک نظر ڈالی

کلی کلی میں خزاں کے چراغ جلتے تھے

تمام عمر وفا کے گناہ گار رہے

یہ اور بات کہ ہم آدمی تو اچھے تھے

شب خموش کو تنہائی نے زباں دے دی

پہاڑ گونجتے تھے دشت سنسناتے تھے

وہ ایک بار مرے جن کو تھا حیات سے پیار

جو زندگی سے گریزاں تھے روز مرتے تھے

نئے خیال اب آتے ہیں ڈھل کے آہن میں

ہمارے دل میں کبھی کھیت لہلہاتے تھے

یہ ارتقا کا چلن ہے کہ ہر زمانے میں

پرانے لوگ نئے آدمی سے ڈرتے تھے

ندیمؔ جو بھی ملاقات تھی ادھوری تھی

کہ ایک چہرے کے پیچھے ہزار چہرے تھے

wo koi aur na tha chand khushk patte the

shajar se tut ke jo fasl-e-gul pe roe the

abhi abhi tumhen socha to kuchh na yad aya

abhi abhi to ham ik dusre se bichhre the

tumhare baad chaman par jab ik nazar dali

kali kali mein khizan ke charagh jalte the

tamam umr wafa ke gunah gar rahe

ye aur bat ke ham admi to achchhe the

shab-e-khamosh ko tanhai ne zaban de di

pahar gunjte the dasht sansanate the

wo ek bar mire jin ko tha hayat se pyar

jo zindagi se gurezan the roz marte the

nae khayal ab ate hain dhal ke ahan mein

hamare dil mein kabhi khet lahlahate the

ye irtiqa ka chalan hai ke har zamane mein

purane log nae admi se darte the

nadim jo bhi mulaqat thi adhuri thi

ke ek chehre ke pichhe hazar chehre the