اک محبت کے عوض ارض و سما دے دوں گا

اک محبت کے عوض ارض و سما دے دوں گا

تجھ سے کافر کو تو میں اپنا خدا دے دوں گا

جستجو بھی مرا فن ہے مرے بچھڑے ہوئے دوست

جو بھی در بند ملا اس پہ صدا دے دوں گا

ایک پل بھی ترے پہلو میں جو مل جائے تو میں

اپنے اشکوں سے اسے آب بقا دے دوں گا

رخ بدل دوں گا صبا کا ترے کوچے کی طرف

اور طوفان کو اپنا ہی پتا دے دوں گا

جب بھی آئیں مرے ہاتھوں میں رتوں کی باگیں

برف کو دھوپ تو صحرا کو گھٹا دے دوں گا

تو کرم کر نہیں سکتا تو ستم توڑ کے دیکھ

میں ترے ظلم کو بھی حسن ادا دے دوں گا

ختم گر ہو نہ سکی عذر تراشی تیری

اک صدی تک تجھے جینے کی دعا دے دوں گا

ik mohabbat ke ewaz arz-o-sama de dunga

tujh se kafir ko to main apna khuda de dunga

justuju bhi mira fan hai mire bichhre hue dost

jo bhi dar band mila us pe sada de dunga

ek pal bhi tire pahlu mein jo mil jae to main

apne ashkon se use ab-e-baqa de dunga

rukh badal dunga saba ka tire kuche ki taraf

aur tufan ko apna hi pata de dunga

jab bhi aen mire hathon mein ruton ki bagen

barf ko dhup to sahra ko ghata de dunga

tu karam kar nahin sakta to sitam tor ke dekh

main tire zulm ko bhi husn-e-ada de dunga

khatm gar ho na saki uzr tarashi teri

ik sadi tak tujhe jine ki dua de dunga