ہم کبھی عشق کو وحشت نہیں بننے دیتے

ہم کبھی عشق کو وحشت نہیں بننے دیتے

دل کی تہذیب کو تہمت نہیں بننے دیتے

لب ہی لب ہے تو کبھی اور کبھی چشم ہی چشم

نقش تیرے تری صورت نہیں بننے دیتے

یہ ستارے جو چمکتے ہیں پس ابر سیاہ

تیرے غم کو مری عادت نہیں بننے دیتے

ان کی جنت بھی کوئی دشت بلا ہی ہوگی

زندہ رہنے کو جو لذت نہیں بننے دیتے

دوست جو درد بٹاتے ہیں وہ نادانی میں

در حقیقت مری سیرت نہیں بننے دیتے

فکر فن کے لیے لازم مگر اچھے شاعر

اپنے فن کو کبھی حکمت نہیں بننے دیتے

وہ محبت کا تعلق ہو کہ نفرت کا ندیمؔ

رابطے زیست کو خلوت نہیں بننے دیتے

ham kabhi ishq ko wahshat nahin banne dete

dil ki tahzib ko tohmat nahin banne dete

lab hi lab hai to kabhi aur kabhi chashm hi chashm

naqsh tere tiri surat nahin banne dete

ye sitare jo chamakte hain pas abr-e-siyah

tere gham ko miri adat nahin banne dete

un ki jannat bhi koi dasht-e-bala hi hogi

zinda rahne ko jo lazzat nahin banne dete

dost jo dard batate hain wo nadani mein

dar haqiqat miri sirat nahin banne dete

fikr fan ke liye lazim magar achchhe shayar

apne fan ko kabhi hikmat nahin banne dete

wo mohabbat ka taalluq ho ke nafrat ka nadim

rabte zist ko khalwat nahin banne dete