جی چاہتا ہے فلک پہ جاؤں

جی چاہتا ہے فلک پہ جاؤں

سورج کو غروب سے بچاؤں

بس میرا چلے جو گردشوں پر

دن کو بھی نہ چاند کو بجھاؤں

میں چھوڑ کے سیدھے راستوں کو

بھٹکی ہوئی نیکیاں کماؤں

امکان پہ اس قدر یقیں ہے

صحراؤں میں بیج ڈال آؤں

میں شب کے مسافروں کی خاطر

مشعل نہ ملے تو گھر جلاؤں

اشعار ہیں میرے استعارے

آؤ تمہیں آئنہ دکھاؤں

یوں بٹ کے بکھر کے رہ گیا ہوں

ہر شخص میں اپنا عکس پاؤں

آواز جو دوں کسی کے در پر

اندر سے بھی خود نکل کے آؤں

اے چارہ گران عصر حاضر

فولاد کا دل کہاں سے لاؤں

ہر رات دعا کروں سحر کی

ہر صبح نیا فریب کھاؤں

ہر جبر پہ صبر کر رہا ہوں

اس طرح کہیں اجڑ نہ جاؤں

رونا بھی تو طرز گفتگو ہے

آنکھیں جو رکیں تو لب ہلاؤں

خود کو تو ندیمؔ آزمایا

اب مر کے خدا کو آزماؤں

ji chahta hai falak pe jaun

suraj ko ghurub se bachaun

bas mera chale jo gardishon par

din ko bhi na chand ko bujhaun

main chhor ke sidhe raston ko

bhatki hui nekiyan kamaun

imkan pe is qadar yaqin hai

sahraon mein bij dal aun

main shab ke musafiron ki khatir

mashal na mile to ghar jalaun

ashar hain mere istiare

ao tumhen aina dikhaun

yun bat ke bikhar ke rah gaya hun

har shakhs mein apna aks paon

awaz jo dun kisi ke dar par

andar se bhi khud nikal ke aun

ai chara garin asr-e-hazir

faulad ka dil kahan se laun

har rat dua karun sahar ki

har subh naya fareb khaun

har jabr pe sabr kar raha hun

is tarah kahin ujar na jaun

rona bhi to tarz-e-guftugu hai

ankhen jo ruken to lab hilaun

khud ko to nadim azmaya

ab mar ke khuda ko azmaun