تجھے کھو کر بھی تجھے پاؤں جہاں تک دیکھوں

تجھے کھو کر بھی تجھے پاؤں جہاں تک دیکھوں

حسن یزداں سے تجھے حسن بتاں تک دیکھوں

تو نے یوں دیکھا ہے جیسے کبھی دیکھا ہی نہ تھا

میں تو دل میں ترے قدموں کے نشاں تک دیکھوں

صرف اس شوق میں پوچھی ہیں ہزاروں باتیں

میں ترا حسن ترے حسن بیاں تک دیکھوں

میرے ویرانۂ جاں میں تری یادوں کے طفیل

پھول کھلتے نظر آتے ہیں جہاں تک دیکھوں

وقت نے ذہن میں دھندلا دیئے تیرے خد و خال

یوں تو میں ٹوٹتے تاروں کا دھواں تک دیکھوں

دل گیا تھا تو یہ آنکھیں بھی کوئی لے جاتا

میں فقط ایک ہی تصویر کہاں تک دیکھوں

اک حقیقت سہی فردوس میں حوروں کا وجود

حسن انساں سے نمٹ لوں تو وہاں تک دیکھوں

tujhe kho kar bhi tujhe paon jahan tak dekhun

husn-e-yazdan se tujhe husn-e-butan tak dekhun

tu ne yun dekha hai jaise kabhi dekha hi na tha

main to dil mein tire qadmon ke nishan tak dekhun

sirf is shauq mein puchhi hain hazaron baten

main tira husn tire husn-e-bayan tak dekhun

mere wirana-e-jan mein tiri yadon ke tufail

phul khulte nazar ate hain jahan tak dekhun

waqt ne zehn mein dhundla diye tere khad-o-khal

yun to main tutte taron ka dhuan tak dekhun

dil gaya tha to ye ankhen bhi koi le jata

main faqat ek hi taswir kahan tak dekhun

ik haqiqat sahi firdaus mein huron ka wajud

husn-e-insan se nimat lun to wahan tak dekhun