کیا ایسے کم سخن سے کوئی گفتگو کرے

کیا ایسے کم سخن سے کوئی گفتگو کرے

جو مستقل سکوت سے دل کو لہو کرے

اب تو ہمیں بھی ترک مراسم کا دکھ نہیں

پر دل یہ چاہتا ہے کہ آغاز تو کرے

تیرے بغیر بھی تو غنیمت ہے زندگی

خود کو گنوا کے کون تری جستجو کرے

اب تو یہ آرزو ہے کہ وہ زخم کھائیے

تا زندگی یہ دل نہ کوئی آرزو کرے

تجھ کو بھلا کے دل ہے وہ شرمندۂ نظر

اب کوئی حادثہ ہی ترے روبرو کرے

چپ چاپ اپنی آگ میں جلتے رہو فرازؔ

دنیا تو عرض حال سے بے آبرو کرے

kya aise kam sukhan se koi guftugu kare

jo mustaqil sukut se dil ko lahu kare

ab to hamen bhi tark-e-marasim ka dukh nahin

par dil ye chahta hai ke aghaz to kare

tere baghair bhi to ghanimat hai zindagi

khud ko ganwa ke kaun tiri justuju kare

ab to ye arzu hai ke wo zakhm khaiye

ta zindagi ye dil na koi arzu kare

tujh ko bhula ke dil hai wo sharminda-e-nazar

ab koi hadisa hi tire rubaru kare

chup chap apni ag mein jalte raho faraz

duniya to arz-e-hal se be abru kare