اس قدر مسلسل تھیں شدتیں جدائی کی

اس قدر مسلسل تھیں شدتیں جدائی کی

آج پہلی بار اس سے میں نے بے وفائی کی

ورنہ اب تلک یوں تھا خواہشوں کی بارش میں

یا تو ٹوٹ کر رویا یا غزل سرائی کی

تج دیا تھا کل جن کو ہم نے تیری چاہت میں

آج ان سے مجبوراً تازہ آشنائی کی

ہو چلا تھا جب مجھ کو اختلاف اپنے سے

تو نے کس گھڑی ظالم میری ہم نوائی کی

ترک کر چکے قاصد کوئے نامراداں کو

کون اب خبر لاوے شہر آشنائی کی

طنز و طعنہ و تہمت سب ہنر ہیں ناصح کے

آپ سے کوئی پوچھے ہم نے کیا برائی کی

پھر قفس میں شور اٹھا قیدیوں کا اور صیاد

دیکھنا اڑا دے گا پھر خبر رہائی کی

دکھ ہوا جب اس در پر کل فرازؔ کو دیکھا

لاکھ عیب تھے اس میں خو نہ تھی گدائی کی

is qadar musalsal thin shiddaten judai ki

aj pahli bar us se main ne be wafai ki

warna ab talak yun tha khwahishon ki barish mein

ya to tut kar roya ya ghazal sarai ki

taj diya tha kal jin ko ham ne teri chahat mein

aj un se majburan taza ashnai ki

ho chala tha jab mujh ko ikhtilaf apne se

tu ne kis ghari zalim meri ham nawai ki

tark kar chuke qasid ku-e-namuradan ko

kaun ab khabar lawe shahr ashnai ki

tanz-o-taana-o-tohmat sab hunar hain naseh ke

ap se koi puchhe ham ne kya burai ki

phir qafas mein shor utha qaidiyon ka aur sayyad

dekhna ura dega phir khabar rihai ki

dukh hua jab us dar par kal faraz ko dekha

lakh aib the is mein khu na thi gadai ki