ہوئی ہے شام تو آنکھوں میں بس گیا پھر تو

ہوئی ہے شام تو آنکھوں میں بس گیا پھر تو

کہاں گیا ہے مرے شہر کے مسافر تو

مری مثال کہ اک نخل خشک صحرا ہوں

ترا خیال کہ شاخ چمن کا طائر تو

میں جانتا ہوں کہ دنیا تجھے بدل دے گی

میں مانتا ہوں کہ ایسا نہیں بظاہر تو

ہنسی خوشی سے بچھڑ جا اگر بچھڑنا ہے

یہ ہر مقام پہ کیا سوچتا ہے آخر تو

فضا اداس ہے رت مضمحل ہے میں چپ ہوں

جو ہو سکے تو چلا آ کسی کی خاطر تو

فرازؔ تو نے اسے مشکلوں میں ڈال دیا

زمانہ صاحب زر اور صرف شاعر تو

hui hai sham to ankhon mein bas gaya phir to

kahan gaya hai mire shahr ke musafir to

miri misal ke ik nakhl-e-khushk sahra hun

tira khayal ke shakh-e-chaman ka tair to

main janta hun ke duniya tujhe badal degi

main manta hun ke aisa nahin bazahir to

hansi khushi se bichhar ja agar bichharna hai

ye har maqam pe kya sochta hai akhir to

faza udas hai rut muzmahil hai main chup hun

jo ho sake to chala a kisi ki khatir to

faraz tu ne use mushkilon mein dal diya

zamana sahab-e-zar aur sirf-e-shayar to