اگرچہ زور ہواؤں نے ڈال رکھا ہے

اگرچہ زور ہواؤں نے ڈال رکھا ہے

مگر چراغ نے لو کو سنبھال رکھا ہے

محبتوں میں تو ملنا ہے یا اجڑ جانا

مزاج عشق میں کب اعتدال رکھا ہے

ہوا میں نشہ ہی نشہ فضا میں رنگ ہی رنگ

یہ کس نے پیرہن اپنا اچھال رکھا ہے

بھلے دنوں کا بھروسا ہی کیا رہیں نہ رہیں

سو میں نے رشتۂ غم کو بحال رکھا ہے

ہم ایسے سادہ دلوں کو وہ دوست ہو کہ خدا

سبھی نے وعدۂ فردا پہ ٹال رکھا ہے

حساب لطف حریفاں کیا ہے جب تو کھلا

کہ دوستوں نے زیادہ خیال رکھا ہے

بھری بہار میں اک شاخ پر کھلا ہے گلاب

کہ جیسے تو نے ہتھیلی پہ گال رکھا ہے

فرازؔ عشق کی دنیا تو خوبصورت تھی

یہ کس نے فتنۂ ہجر و وصال رکھا ہے

agarche zor hawaon ne dal rakha hai

magar charagh ne lo ko sambhal rakha hai

mohabbaton mein to milna hai ya ujar jana

mizaj-e-ishq mein kab etidal rakha hai

hawa mein nasha hi nasha faza mein rang hi rang

ye kis ne pairahan apna uchhal rakha hai

bhale dinon ka bharosa hi kya rahen na rahen

so main ne rishta-e-gham ko bahal rakha hai

ham aise sada dilon ko wo dost ho ke khuda

sabhi ne waada-e-farda pe tal rakha hai

hisab-e-lutf-e-harifan kya hai jab to khula

ke doston ne ziyada khayal rakha hai

bhari bahar mein ik shakh par khula hai gulab

ke jaise tu ne hatheli pe gal rakha hai

faraz ishq ki duniya to khubsurat thi

ye kis ne fitna-e-hijr-o-wisal rakha hai