شعلہ تھا جل بجھا ہوں ہوائیں مجھے نہ دو

شعلہ تھا جل بجھا ہوں ہوائیں مجھے نہ دو

میں کب کا جا چکا ہوں صدائیں مجھے نہ دو

جو زہر پی چکا ہوں تمہیں نے مجھے دیا

اب تم تو زندگی کی دعائیں مجھے نہ دو

یہ بھی بڑا کرم ہے سلامت ہے جسم ابھی

اے خسروان شہر قبائیں مجھے نہ دو

ایسا نہ ہو کبھی کہ پلٹ کر نہ آ سکوں

ہر بار دور جا کے صدائیں مجھے نہ دو

کب مجھ کو اعتراف محبت نہ تھا فرازؔ

کب میں نے یہ کہا ہے سزائیں مجھے نہ دو

shola tha jal bujha hun hawaen mujhe na do

main kab ka ja chuka hun sadaen mujhe na do

jo zahr pi chuka hun tumhen ne mujhe diya

ab tum to zindagi ki duaen mujhe na do

ye bhi bara karam hai salamat hai jism abhi

ai khasarwan shahr qabaen mujhe na do

aisa na ho kabhi ke palat kar na a sakun

har bar dur ja ke sadaen mujhe na do

kab mujh ko etiraf mohabbat na tha faraz

kab main ne ye kaha hai sazaen mujhe na do