نہ حریف جاں نہ شریک غم شب انتظار کوئی تو ہو — احمد فراز (Ahmad Faraz)

Arooz is now on the App Store, for iPhone and iPad. Download →

Ahmad Faraz (1931–2008)

نہ حریف جاں نہ شریک غم شب انتظار کوئی تو ہو

کسے بزم شوق میں لائیں ہم دل بے قرار کوئی تو ہو

کسے زندگی ہے عزیز اب کسے آرزوئے شب طرب

مگر اے نگار وفا طلب ترا اعتبار کوئی تو ہو

کہیں تار دامن گل ملے تو یہ مان لیں کہ چمن کھلے

کہ نشان فصل بہار کا سر شاخسار کوئی تو ہو

یہ اداس اداس سے بام و در یہ اجاڑ اجاڑ سی رہگزر

چلو ہم نہیں نہ سہی مگر سر کوئے یار کوئی تو ہو

یہ سکون جاں کی گھڑی ڈھلے تو چراغ دل ہی نہ بجھ چلے

وہ بلا سے ہو غم عشق یا غم روزگار کوئی تو ہو

سر مقتل شب آرزو رہے کچھ تو عشق کی آبرو

جو نہیں عدو تو فرازؔ تو کہ نصیب دار کوئی تو ہو