گفتگو اچھی لگی ذوق نظر اچھا لگا

گفتگو اچھی لگی ذوق نظر اچھا لگا

مدتوں کے بعد کوئی ہم سفر اچھا لگا

دل کا دکھ جانا تو دل کا مسئلہ ہے پر ہمیں

اس کا ہنس دینا ہمارے حال پر اچھا لگا

ہر طرح کی بے سر و سامانیوں کے باوجود

آج وہ آیا تو مجھ کو اپنا گھر اچھا لگا

باغباں گلچیں کو چاہے جو کہے ہم کو تو پھول

شاخ سے بڑھ کر کف دل دار پر اچھا لگا

کوئی مقتل میں نہ پہنچا کون ظالم تھا جسے

تیغ قاتل سے زیادہ اپنا سر اچھا لگا

ہم بھی قائل ہیں وفا میں استواری کے مگر

کوئی پوچھے کون کس کو عمر بھر اچھا لگا

اپنی اپنی چاہتیں ہیں لوگ اب جو بھی کہیں

اک پری پیکر کو اک آشفتہ سر اچھا لگا

میرؔ کے مانند اکثر زیست کرتا تھا فرازؔ

تھا تو وہ دیوانہ سا شاعر مگر اچھا لگا

guftugu achchhi lagi zauq-e-nazar achchha laga

muddaton ke baad koi ham safar achchha laga

dil ka dukh jana to dil ka masala hai par hamen

us ka hans dena hamare hal par achchha laga

har tarah ki be sar-o-samaniyon ke bawajud

aj wo aya to mujh ko apna ghar achchha laga

baghban gulchin ko chahe jo kahe ham ko to phul

shakh se barh kar kaf-e-dil dar par achchha laga

koi maqtal mein na pahuncha kaun zalim tha jise

tegh-e-qatil se ziyada apna sar achchha laga

ham bhi qail hain wafa mein ustuwari ke magar

koi puchhe kaun kis ko umr bhar achchha laga

apni apni chahaten hain log ab jo bhi kahin

ik pari paikar ko ik ashufta sar achchha laga

mir ke manind aksar zist karta tha faraz

tha to wo diwana sa shayar magar achchha laga